كوروناۆيرۋس: شىمكەنتتەگى ستاتسيوناردىڭ بىرىنەن سوڭعى ناۋقاس جازىلىپ شىقتى
بۇگىنگە دەيىن بۇل ورتالىقتا 400 گە جۋىق ادام ەم قابىلداپ، دەرتىنەن ايىققان بولاتىن، دەپ حابارلايدى قازاقپارات ءتىلشىسى.
قالالىق دەنساۋلىق ساقتاۋ باسقارماسىنىڭ مالىمەتىنشە، ماقپال تاستانوۆا ەسىمدى ناۋقاس ت. ورىنبايەۆ اتىنداعى گيپەرباريالىق وكسيگەناتسيا ورتالىعىنا 19-تامىز كۇنى جەدەل جاردەم قىزمەتىمەن جەتكىزىلگەن. تەكسەرۋ بارىسىندا ونىڭ ەكى جاقتى ۆيرۋستى پنيەۆمونياعا شالدىققانى انىقتالعان. دارىگەرلەر ناۋقاستىڭ جاعدايىن بايقاپ، بىردەن ەم-دوم شارالارىن جۇرگىزگەن. ۋاقىت وتە كەلە كوپبالالى انانىڭ دەنساۋلىعى جاقسارىپ، ارنايى ستاتسيوناردان شىعارىلدى.
«ورتالىقتىڭ بارشا دارىگەرىنە العىسىم شەكسىز. بالالارىمدى قاتتى ساعىندىم. ەندى وتباسىممەن امان- ەسەن قاۋىشاتىن بولدىم»، - دەيدى ول.
ايتا كەتەيىك، ت. ورىنبايەۆ اتىنداعى گيپەرباريالىق وكسيگەناتسيا ورتالىعى جۇقپالى دەرت ورشىگەن تۇستا پروزيزورلىق ستاتسيونار رەتىندە ناۋقاستاردى قابىلداي باستادى. ەندىگى مەديتسينالىق ۇيىم شتاتتىق رەجيمدەگى جۇمىسىن جالعاستىراتىن بولادى.
اۆتور: اينۇر اقبايەۆا
