قاراۋسىز جايىلعان مال جول اپاتىنا ءجيى سەبەپ بولادى

«سوڭعى كەزدەرى ازاماتتاردىڭ مال جايۋعا جاۋاپسىز قاراۋ جاعدايلارى جيىلەپ كەتتى. وعان قوسا، مال يەلەرىنىڭ ولاردى ەش قيىندىقسىز اسىراۋعا دەگەن ۇمتىلىسى باسقالار ءۇشىن پروبلەماعا اينالۋدا. ءتىپتى سوڭى قايعىلى جاعدايعا اپارىپ سوعاتىن كەزدەر دە بولادى. ويتكەنى جولدا يەسىز جايىلىپ جۇرگەن ءۇي جانۋارلارى جول- كولىك وقيعاسىنا سەبەپشى بولىپ جاتادى»، - دەدى پاۆلودار وبلىسى پوليتسيا دەپارتامەنتىنىڭ باسپا ءسوز قىزمەتى.

ءتارتىپ ساقشىلارىنىڭ مالىمەتىنشە، وسىنداي اپاتتىڭ سالدارىنان بالالار اتا- اناسىنان ايرىلعان. كەشكىلىك مەزگىلدە «ۆاز-21014» اۆتوكولىگىنىڭ 32 جاستاعى جۇرگىزۋشىسى لەنين- ەرتىس تاسجولىندا جىلقىلاردى قاعىپ كەتتى. ولار جول بويىندا جايىلىپ جۇرگەن.

«قايعىلى اپات سالدارىنان كولىك جۇرگىزۋشىسى العان جاراقاتىنان سول جەردە قايتىس بولدى. 1990 -جىلى تۋعان جۇبايى اۋرۋحانادا كوز جۇمدى. 2014، 2015 جانە 2017 -جىلدارى تۋعان كامەلەتكە تولماعان بالالار ءتۇرلى جاراقاتپەن اۋرۋحاناعا جاتقىزىلدى، - دەپ تولىقتىردى دەپارتامەنتتە.

- مال يەلەرىنىڭ جاۋاپسىزدىعىنان، شوپان جالداپ، قاراجات جۇمساماۋى سالدارىنان ءبىر وتباسىنىڭ تاعدىرى تالكەككە ۇشىراپ، ءۇش بالا جەتىم قالدى». بۇگىنگى تاڭدا وبلىس اۋماعىندا 142-ايىپپۇل تۇراعى جۇمىس ىستەيدى. تەك سوڭعى اپتانىڭ وزىندە ايىپ تۇراعىنا 90 نان استام مال باسى ايداپ اكەلىندى. ولار ەش قاراۋسىز جايىلىپ جۇرگەن.