قىتاي سوتى اقجارقىن تۇرلىبايدىڭ ۇكىمىن وزگەرىسسىز قالدىردى

بۇل تۋرالى قىزدىڭ ادۆوكاتى سۇڭقار نۇرماعانبەتوۆ ايتتى.

ادۆوكات اقجارقىننىڭ ءومىر بويىنا باس بوستاندىعىنان ايىرىلعانىن ەسكە سالدى.

«2019-جىلدىڭ 27- جەلتوقسانىندا گۋانجوۋ سوتىندا اقجارقىنعا قاتىستى قىلمىستىق ءىس بويىنشا ۇكىم جاريالاندى. قورعاۋشى تاراپ سوت ۇكىمىنە شاعىم جاسادى. الايدا اپەللياتسيالىق سوت ۇكىمىن وزگەرىسسىز قالدىردى»، - دەدى زاڭگەر.

سونداي-اق، ول اقجارقىن تۇرلىبايدىڭ قازاقستان كولونياسىنا جەتكىزىلۋى مۇمكىن ەكەنىن اتاپ ءوتتى.

«قازىرگى تاڭدا اقجارقىن تۇرلىبايدىڭ وتباسى اقجارقىندى قازاقستانعا جەتكىزۋ ماسەلەسىن قاراستىرىپ جاتىر، وعان اقجارقىننىڭ ءوزىنىڭ كەلىسىمى قاجەت. اقجارقىننىڭ قازاقستانعا جەتكىزىلۋىنىڭ ناقتى مەرزىمى بەلگىسىز، ونىڭ تەزىرەك جەتكىزىلۋى - ءبىزدىڭ مۇددەمىز»، - دەدى ادۆوكات.

ەسكە سالايىق، قازاقستاندىق اقجارقىن تۇرلىباي 2014-جىلى گۋانجوۋ اۋەجايىندا ۇستالعان بولاتىن. كەيىن ونى ءومىر بويىنا باس بوستاندىعىنان ايىرعان بولاتىن. ءبىراق كەيىن سوت ۇكىمى جويىلىپ، ءىس قايتا قاراۋعا جولداندى.