التاي كولگىنوۆ استانا جاستارىمەن كەزدەستى
نۇر-سۇلتان اكىمى جاستارمەن اشىق اسپان استىندا، «ەركىن ميكروفون» فورماتىندا كەزدەسۋ وتكىزدى.
«ەلوردا جاستارى» استانالىق باعدارلاماسىنىڭ تۇجىرىمداماسىن ازىرلەپ جاتىرمىز. بۇگىن جاستار ۇيىمدارىنىڭ وكىلدەرىمەن، ەرىكتىلەرمەن كەزدەسىپ، ۇسىنىستارىن تىڭدادىق. ولاردىڭ يدەيالارىن باعدارلاما تۇجىرىمداماسىنا ەنگىزەمىز. جاستار - ەلىمىزدىڭ دامۋ درايۆەرى، پاندەميا كەزىندە ولار كوروناۆيرۋسپەن كۇرەسۋگە زور ۇلەس قوستى. ارنايى وقىتىلعان ەرىكتىلەر بلوكپوستاردا كەزەكشىلىك اتقاردى، دەزينفەكتسيا جۇمىستارىن جۇرگىزدى، ءدارى-دارمەكتەر مەن قورعانىس قۇرالدارىن تاسىمالدادى. زەينەتكەرلەرىمىز بەن مەديتسينا قىزمەتكەرلەرىنە كومەك كورسەتۋدى جالعاستىرىپ جاتىر»، - دەپ جازدى اكىم Instagram-دا.
سونداي-اق ا. كولگىنوۆ كونستيتۋتسيا كۇنى قارساڭىندا ەلباسى ن. نازاربايەۆ جانە پرەزيدەنت ق. توقايەۆتىڭ اتىنان جاستار ۇيىمدارى مەن ۆولونتەرلىك قوزعالىستارىنىڭ بەلسەندى وكىلدەرىنە العىس حاتتار تابىس ەتتى.
«كەلگەن ءار ادامنىڭ پىكىرىن تىڭداۋ ءبىز ءۇشىن ماڭىزدى بولدى. جاستار تۇرعىن ءۇي باعدارلاماسىنىڭ ماسەلەلەرىن كوتەردى. بيىل جۇمىس ىستەيتىن جاستارعا ارنالعان جالعا بەرىلەتىن تۇرعىن ءۇي باعدارلاماسىن جالعاستىرامىز. سونىمەن بىرگە ەكولوگيا، ۆولونتەرلىك جوبالاردى قولداۋ: ءتۇرلى تاقىرىپتار مەن سالالار بويىنشا تەگىن كۋرستاردى وتكىزۋ، ءىسىن جاڭا باستاعان كاسىپكەرلەردى قولداۋ، سپورتپەن شۇعىلدانۋعا بولاتىن سپورت عيماراتتارى سانىن ارتتىرۋ جانە ت. ب. ماسەلەلەر كوتەرىلدى. جاستارىمىزدىڭ قالانى دامىتۋعا اتسالىسىپ جاتقانى قۋانتادى. سۇراقتاردىڭ باسىم بولىگى شەشىمىن تاپتى، قالعاندارى بويىنشا تاعى دا كەزدەسۋلەر وتكىزەمىز»، - دەدى ەلوردا باسشىسى.
