قازاقستاندىق جاستار «جاس عالىمدار ءۇيىن» سالۋدى ۇسىندى

كەزدەسۋ بارىسىندا «Jas Otan» جق جەتەكشىسى ەلنۇر بەيسەنبايەۆ بەلگىلى ءبىر ءوڭىردىڭ، اۋداننىڭ نەمەسە اۋىلدىڭ ماسەلەلەرىن شەشۋ ءۇشىن ناقتى جول كارتالارى ازىرلەنەتىنىن اتاپ ءوتتى. «ءبىز العاش رەت ناقتى شارالار كەشەنى مەن بەلگىلەنگەن ينديكاتورلارى بار 216 وڭىرلىك جول كارتاسىن دايىندايمىز. ءار جول كارتاسى سول اۋداندى، قالانى قامتيتىن بولادى، ال جەرگىلىكتى جاستار ينديكاتورلاردىڭ ورىندالۋ بارىسىن وزدەرى باقىلاي الادى. وسىنداي جول كارتاسىنىڭ ناقتى تارماقتارىنىڭ ءبىرى - جاستار اراسىنداعى جۇمىسسىزدىقتى % 3,7 دەيىن تومەندەتۋ» ، - دەدى ە. بەيسەنبايەۆ.

ال تاريحشى، ارحەولوگ، PhD دوكتورى، ۇلتتىق مۋزەي ديرەكتورىنىڭ عىلىمي جۇمىس جونىندەگى ورىنباسارى ايبار قاسەنالين جاستارعا سالالىق سىيلىقتار تابىستاۋدى ۇسىندى.

«مەنىڭ ويىمشا، «دارىن» سىيلىعى جاس قازاقستاندىقتاردىڭ ەڭبەگىن باعالاۋ ءۇشىن جەتكىلىكسىز، سوندىقتان جاس قازاقستاندىقتاردى «جاس عالىم» ، «جاس تالانت» ، «جاس جازۋشى» سياقتى سىيلىقتاردى تاعايىنداۋ ارقىلى ىنتالاندىرۋدى ۇسىنامىن»، - دەدى ايبار قاسەنالين.

سونىمەن بىرگە، ا. قاسەنالين عىلىممەن اينالىساتىن جاستاردىڭ قاجەتتىلىگىن ەسكەرە وتىرىپ، جاس عالىمدار ءۇيىن سالۋدى ۇسىندى. كوركەم گيمناستيكادان حالىقارالىق دارەجەدەگى سپورت شەبەرى اننا اليابيەۆا جاستار اراسىندا سپورت، سالاۋاتتى ءومىر سالتىن دامىتۋدى جانە وسال توپتاعى ادامدارعا سپورتپەن شۇعىلدانۋعا كومەكتەسۋ كەرەكتىگىن اتاپ ءوتتى.

ايتا كەتەيىك، «جاستار - وتانعا!» 2025 -جىلعا دەيىنگى باعدارلاماسى «Jas Otan» جاستار قاناتىنىڭ V سەزىندە قابىلدانادى. قازىرگى ۋاقىتتا باعدارلاما جوباسى ەلىمىزدىڭ بارلىق وڭىرىندە تالقىلانىپ جاتىر.