الماتىدا ەكى جاڭا وقۋشىلار سارايى سالىنۋدا

«وتكەن جىلى مەن الاتاۋ جانە ناۋرىزباي اۋداندارىندا مەكتەپ وقۋشىلارىنا ارنالعان ەكى كوپسالالى وقۋشىلار سارايىن سالۋدى تاپسىرعان بولاتىنمىن. بۇگىنگى كۇنى قۇرىلىس ءۇشىن جەر ۋچاسكەلەرى ءبولىندى. ءتيىستى تەحنيكالىق قۇجاتتاما دايىندالىپ جاتىر. بۇل جوبا مەملەكەتتىك- جەكەمەنشىك ارىپتەستىك شەڭبەرىندە جۇزەگە اسىرىلادى. كەلەسى جىلى قۇرىلىس جۇمىستارى باستالادى»، - دەدى اكىم.

سونىمەن قاتار، ول قالادا 23 مىڭ بالانى قامتيتىن 9 مەملەكەتتىك مۋزىكالىق مەكتەپ جانە 8 وقۋشىلار ءۇيى بار ەكەنىن اتاپ ءوتتى. الايدا، بۇل وقۋشىلار سانىنىڭ نەبارى %9 ىن قۇرايدى.

«العا قويىلعان مىندەتتەردى ۇكىمەتتىك ەمەس ۇيىمدارمەن بىرگە شەشۋ ءۇشىن 2020-2021 -جىلدارى سپورت جانە مادەني- كوڭىل كوتەرۋ مەكەمەلەرىنە، مەكتەپتەن تىس قوسىمشا ءبىلىم بەرۋ مەكەمەلەرىنە قالا بالالارىن جاپپاي تارتۋ ماقساتىندا «جول كارتاسى» جاسالدى. ونى ىسكە اسىرۋعا ءبىلىم باسقارماسىنان وزگە، سپورت، مادەنيەت، قوعامدىق دامۋ، قوعامدىق دەنساۋلىق باسقارمالارى دا تارتىلاتىن بولادى»، - دەيدى باقىتجان ساعىنتايەۆ.

قالاداعى سپورت، مادەنيەت نىساندارى، جاستار ورتالىقتارى جانە باسقا نىساندار بالالار ءۇشىن اشىق ءارى قولجەتىمدى بولادى.

«تەك سپورت سالاسىنىڭ وزىندە عانا الاتاۋ اۋدانىندا بەس دەنەشىنىقتىرۋ- ساۋىقتىرۋ كەشەندەرىن، تەننيس ورتالىعىن، شاڭعى ترامپلينينىڭ حالىقارالىق كەشەنىندە جاڭا نىساندار سالاتىن بولامىز»، - دەپ اتاپ ءوتتى شاھار باسشىسى.

مادەنيەت سالاسىندا ورتالىقتاندىرىلعان كىتاپحانا جۇيەسىنىڭ 10 كىتاپحانا- فيليالدارى جاڭارتىلۋدا. «جۇمىسپەن قامتۋدىڭ جول كارتاسى-2020» اياسىندا قالا مۋزەيلەرىنە اعىمداعى جوندەۋ جۇمىستارى جۇرگىزىلدى، Almaty Creative Hub-تىڭ كرەاتيۆتى مادەنيەتىنىڭ ستراتەگياسى قابىلداندى. «وسىلايشا، قالانىڭ بارلىق رەسۋرستارى جانە قولدا بار مۇمكىندىكتەرى بالالاردى سپورتپەن، شىعارماشىلىقپەن، وزدىگىنەن ءبىلىم الۋعا جانە وزدىگىنەن دامۋىنا كەڭىنەن تارتۋعا باعىتتالعان. بۇل ءبىزدىڭ ورتاق ماقساتىمىز بولۋى ءتيىس»، - دەدى ب. ساعىنتايەۆ.

اۆتور: الما مۇقانوۆا