بەيجىڭدە كوروناۆيرۋسپەن اۋىراتىن بىردە-ءبىر ادام قالعان جوق

بەيجىڭدە كوروناۆيرۋس ەپيدەمياسى باستالعاننان بەرى العاش رەت COVID-19 جۇقتىرعان بىردە-ءبىر ادام قالعان جوق.

ەسكە سالا كەتسەك، كوروناۆيرۋس تارالا باستاعان كەزدەن بەرى قىتاي استاناسىندا 935 ادام COVID-19 جۇقتىرعان، سونىڭ ىشىندە 335 ادام ماۋسىم ايىندا «سينفادي» كوتەرمە بازارىندا بولعان ورشۋدەن كەيىن اۋىرىپ قالعان.

قازىرگى كەزدە بەيجىڭ بيلىگى ەپيدەميولوگيالىق قاداعالاۋ شارالارىن السىرەتتى: ەندى كوشەلەردە ماسكا تاعۋ مىندەتتى ەمەس. ءبىراق قوعامدىق كولىكتەر مەن ادامدار كوپ جينالاتىن جەرلەردە (ساۋدا ورتالىقتارى، مادەني جانە ويىن-ساۋىق مەكەمەلەر، مەملەكەتتىك مەكەمەلەر) ماسكا تاعۋ قاجەت.

رەسمي ستاتيستيكا بويىنشا، قۇرلىقتىق قىتايدا ىندەت جۇقتىرعان ادامداردىڭ 94 پايىزدان استامى جازىلىپ شىققان.

2019-جىلدىڭ جەلتوقسان ايىنان بەرى Covid-19 ۆيرۋسىن 85 مىڭعا جۋىق ادام جۇقتىردى. ءولىم كورسەتكىشى 5,45 پايىزدى كورسەتىپ وتىر (4,6 مىڭنان استام ادام قايتىس بولدى). بۇكىل ەل بويىنشا اۋرۋحانالاردا دياگنوزى راستالعان 324 ادام جاتىر (وتكەن كۇنى 31 ادام جازىلىپ شىقتى).

ءتورت پاتسيەنتتىڭ جاعدايى اۋىر.