قازاقستان ءوزىن استىقپەن تولىق قامتاماسىز ەتەدى - پرەمەر-مينيستر
«قازىرگى ۋاقىتتا بارلىق وڭىرلەر جاپپاي ەگىن جيناۋعا كىرىستى. نەگىزگى استىق ەگەتىن وڭىرلەردە اۋا رايى جازدىڭ ورتاسىندا قۇرعاق بولسا، قازىر - تۇراقسىز. سوندىقتان ءونىمدى جيناپ الۋمەن قاتار، جۇمىستى بارىنشا تومەن شىعىنمەن ورىنداپ ۇلگەرۋ ماڭىزدى»، - دەدى پرەمەر-مينيستر بۇگىنگى ۇكىمەت وتىرىسىندا.
ونىڭ ايتۋىنشا، ۇكىمەت تاراپىنان ەگىن جيناۋ جۇمىستارىن قارجىلاي جانە ماتەريالدىق-تەحنيكالىق قامتاماسىز ەتۋ جونىندە بارلىق قاجەتتى شەشىمدەر قابىلداندى. جالپى، بارلىق قابىلدانعان شارالار ەسەبىنەن بيىلعى استىقتىڭ بولجامدى جالپى جينالىمى 18 ميلليون توننا دەڭگەيىندە جوسپارلانىپ وتىر.
«قازاقستان ءوزىن استىقپەن تولىق قامتاماسىز ەتەدى. ەكسپورت الەۋەتى دە جاقسى بولادى. قوماقتى رەسۋرستىق بازاسى مەن گەوگرافيالىق جاعىنان اسا ءىرى وتكىزۋ نارىقتارىنىڭ ورتاسىندا ىڭعايلى ورنالاسۋى وتاندىق اگروونەركاسىپ كەشەنىن دامىتۋ ءۇشىن جانە قازاقستاننىڭ الەمدىك ازىق-تۇلىك حابىنا اينالۋىنا جاعداي جاسايدى. تاۋارلار مەن قىزمەت نارىعىنداعى كۇردەلى جاعدايدى ەسكەرگەننىڭ وزىندە، نارىقتاعى استىق پەن باسقا دا ازىق-تۇلىك ءونىمى باعاسىنىڭ سەرپىنى تۇراقتى، ءتىپتى وڭ بولىپ تابىلادى. سوندىقتان ءبىز اگروونەركاسىپتىك كەشەندى ورتا جانە ۇزاق مەرزىمدى پەرسپەكتيۆادا ەكونوميكانىڭ نەگىزگى لوكوموتيۆتەرىنىڭ ءبىرى رەتىندە كورەمىز»، - دەدى اسقار مامين.
بۇعان دەيىن ق ر اۋىل شارۋاشىلىعى ءمينيسترى ساپارحان وماروۆ توتەنشە جاعداي مەن كارانتين رەجيمىنە قاراماستان، ەگىن جيناۋ قارقىنى كوبەيگەنىن مالىمدەدى.
