قازاقستاندا قۇقىق قورعاۋ ورگاندارىنا جۇمىسقا قابىلداۋ ءتارتىبى وزگەردى

مەملەكەت باسشىسىنىڭ تاپسىرماسىن ورىنداۋ ءۇشىن باس پروكۋراتۋرا قۇقىق قورعاۋ ورگاندارىمەن بىرلەسىپ، شەت ەلدەردىڭ وزىق تاجىريبەسىن ەسكەرە وتىرىپ، پروكۋراتۋرا ورگاندارىنا، سىبايلاس جەمقورلىققا قارسى قىزمەتكە جانە ەكونوميكالىق تەرگەۋ قىزمەتىنە كادرلاردى ىرىكتەۋ مەن دايارلاۋدىڭ ءبىرىڭعاي ءتاسىلىن ازىرلەدى. بۇرىن ءاربىر ورگان قىزمەتكە كىرۋ ءۇشىن كادر رەزەرۆىن دەربەس قالىپتاستىردى (كونكۋرس، رەزەرۆكە قابىلداۋ، كانديداتتاردى ىرىكتەۋ، قىزمەتكە قابىلداۋ، كادرلاردى ورنالاستىرۋ) .

قازىر زاڭناماداعى وزگەرىستەرگە سايكەس («قۇقىق قورعاۋ قىزمەتى تۋرالى» زاڭنىڭ 11-بابى) قۇقىق قورعاۋ قىزمەتىنە كىرۋدىڭ مىندەتتى شارتى – ق ر باس پروكۋراتۋراسى جانىنداعى قۇقىق قورعاۋ ورگاندارى اكادەمياسىندا باستاپقى كاسىپتىك دايارلىقتان ءوتۋ بولادى. اكادەمياعا ءتۇسۋ ءۇشىن جوعارى ءبىلىمنىڭ بولۋى، مورالدىق- پسيحولوگيالىق، مەديتسينالىق تالاپتارعا سايكەستىگى، اشكەرەلەيتىن مالىمەتتەردىڭ بولماۋى قاجەت.

ىرىكتەۋدىڭ نەگىزگى كەزەڭدەرى: تەستىلەۋ، اڭگىمەلەسۋ، مەديتسينالىق جانە پسيحوفيزيولوگيالىق كۋالاندىرۋ، پوليگرافولوگيالىق زەرتتەۋ جانە ەمتيحان تاپسىرۋ. اكادەميادا پروكۋراتۋرا، سىبايلاس جەمقورلىققا قارسى قىزمەت جانە ەتق ورگاندارىنىڭ قاتارداعى، كىشى جانە ورتا باسشى قۇرام لاۋازىمدارىنا العاش رەت تۇسەتىن ادامدار وقي الادى.

وقۋ ەكى كەزەڭنەن تۇرادى: اكادەميادا وقۋ جانە قۇقىق قورعاۋ ورگاندارىنىڭ بولىمشەلەرىندە تاعىلىمداما. پروكۋراتۋرا ورگاندارىنا كانديداتتاردى كاسىبي دايارلاۋ مەرزىمى - 1 جىل (6 اي وقۋ جانە 6-اي تاعىلىمداما) ، سىبايلاس جەمقورلىققا قارسى قىزمەتكە جانە ەتق كانديداتتارى ءۇشىن – 6 اي (5 اي وقۋ جانە 1 اي تاعىلىمداما) . اكادەميادا وقۋعا پروفەسسورلىق- وقىتۋشىلىق قۇرامنان باسقا قولدانىستاعى پراكتيكتەر، شەتەلدىك ساراپشىلار، قۇقىق قورعاۋ ورگاندارىنىڭ ارداگەرلەرى تارتىلاتىن بولادى.

وقۋ كەزىندە ءبىلىم الۋشىلار اي سايىنعى ستيپەنديامەن، تاماقپەن جانە تۇرعىن- جايمەن قامتاماسىز ەتىلەدى. وقۋدى ءساتتى اياقتاعاندا ءبىر مەزگىلدە ءبىرىنشى سىنىپتىق شەن نەمەسە بىلىكتىلىك سىنىبى بەرىلە وتىرىپ، سىناق مەرزىمىنسىز لاۋازىمعا تاعايىندالادى. ازاماتتار العاشقى كاسىبي دايارلىققا ىرىكتەۋ تارتىبىمەن كادرلىق دامىتۋ باسقارماسى باستىعى ورىنباسارىنىڭ سۇحباتىنان جانە باس پروكۋراتۋرانىڭ ۆەدومستۆولىق سايتىنان تولىعىراق تانىسا الادى. كاسىپتىك دايارلىققا ىرىكتەۋدىڭ باستالۋ مەرزىمى - 2020 -جىلعى 24 - تامىزدان 24 - قىركۇيەككە دەيىن.