مينيسترلىك بالالاردى كوروناۆيرۋستان قورعاۋعا قاتىستى وزەكتى سۇراقتارعا جاۋاپ بەردى

وسى ورايدا باسپا ءسوز ءماسليحاتىندا كوتەرىلگەن ماسەلەلەردى كوپشىلىك نازارىنا ۇسىنۋدى ءجون كوردىك.

بەلگىلى بولعانداي، مەديتسينا قىزمەتكەرىنىڭ ەڭبەكاقىسىنا ۇستەمە بەرىلەدى.

«ۇستەمەاقى الاتىنداردىڭ ءتىزىمىن جەدەل شتاب جانىندا قۇرىلعان وڭىرلىك كوميسسيالار قالىپتاستىرادى. ال كوميسسيا ءتوراعالارى رەتىندە اكىم ورىنباسارلارى قىزمەت ەتۋدە. سونىمەن قاتار، ونىڭ قۇرامىندا مەديتسينالىق ساقتاندىرۋ قورى فيليالدارىنىڭ قىزمەتكەرلەرى، وڭىرلىك باس سانيتار دارىگەرى، دەنساۋلىق ساقتاۋ باسقارماسىنىڭ جانە ۇكىمەتتىك ەمەس ۇيىمدار وكىلدەرى قامتىلعان»، - دەدى رەسمي وكىل. ونىڭ سوزىنە قاراعاندا، اتالعان ءتىزىم نەگىزىندە مەديتسينا قىزمەتكەرلەرىنە تولەم جاسالادى.

«بۇل تۇرعىدا قوردىڭ مالىمەتىنشە، ۆيرۋستىق ينفەكتسيا جاعدايىندا جۇمىسقا تارتىلعان مەديتسينا قىزمەتكەرلەرىنىڭ سانى اي سايىن وسكەن. ەگەر ناۋرىزدا وسى ۇستەمەاقىنى 19 ادام السا، ماۋسىم ايىندا ولاردىڭ سانى 53 مىڭعا دەيىن جەتتى. ال شىلدە ايىنىڭ قورىتىندىسى بويىنشا ءوزىنىڭ جالاقىسىنا ۇستەمەاقىنى 78 مىڭ قىزمەتكەر الادى»، - دەدى قوجاحمەتوۆ.

سونىمەن قاتار، Covid-19 ىندەتىنەن قايتىس بولعان مەديتسينا قىزمەتكەرلەرىنىڭ وتباسىنا 10 ميلليون تەڭگە سوماسىندا وتەماقى تولەنىپ جاتىر. رەسمي وكىل كوروناۆيرۋسقا قارسى ۆاكتسينانى ساتىپ الۋعا قاتىستى ءتۇسىندىردى. قازىرگى كەزدە COVID-19 ىندەتىنە قارسى ۆاكتسينانى الۋ تۋرالى قانداي دا ءبىر ناقتى شەشىم جاسالماعانىن ايتتى.

«وسى ۆاكتسينالاردى دايارلاۋمەن اينالىسىپ جاتقان ەڭ الدىڭعى قاتارلى زەرتحانالار ءۇشىنشى كەزەڭگە جەتتى، ياعني كلينيكالىق سىناق فازاسىندا تۇر. ولار ءتورتىنشى كەزەڭدى وتكىزۋى كەرەك. وسىدان كەيىن بارلىق حالىقارالىق سەرتيفيكاتتاردان وتكەننەن سوڭ، ءتيىستى ەلدەردى بۇل ۆاكتسينا جاپپاي وندىرۋگە شىعارىلادى»، - دەدى ول.

مۇنىمەن قوسا، باعدات قوجاحمەتوۆ ساباق كەزىندە بالالارعا مەديتسينالىق قولعاپ كيگىزۋدى مىندەتتەۋ تۋرالى الەۋمەتتىك جەلىدەگى اقپاراتقا پىكىر ءبىلدىردى.

«بالالارعا قولعاپ كيگىزۋ مىندەتتى ەمەس ەكەنىن ايتقىم كەلەدى. الەۋمەتتىك جەلىدە تاراعان بۇل اقپارات شىندىققا جاناسپايدى»، - دەدى ول دەگەنمەن، ساباق كەزىندە بالالارعا ماسكا تاعۋ كەرەك بولادى.

سەبەبى بالالار كوروناۆيرۋسپەن سيرەك اۋىرسا دا، اۋرۋدى تاسىمالدايدى. سايكەسىنشە، ىندەتتى ەرەسەك ادامدارعا جۇقتىرۋى مۇمكىن. ءوز كەزەگىندە «پەدياتريا جانە بالالار حيرۋرگياسى عىلىمي ورتالىعى» اق باسقارما ءتورايىمى، مەديتسينا عىلىمىنىڭ دوكتورى ريزا بورانبايەۆا بالالار اراسىنداعى كوروناۆيرۋس ينفەكتسياسىنىڭ تارالۋى جاعدايى تۋرالى ايتتى.

«بالالار كوروناۆيرۋس ينفەكتسياسىنا سيرەك شالدىعادى. جەتكىنشەكتەردە ىندەت كوبىنەسە سيمپتومسىز ءارى جەڭىل فورمادا وتەدى. دەگەنمەن بالالار اراسىندا دا ىندەت اۋىر تۇردە بولدى. جالپى، ىندەت باستالعالى قازاقستاندا كوروناۆيرۋس ينفەكتسياسىمەن 2,5 مىڭعا جۋىق بالا اۋىردى، ونىڭ ىشىندە 111 ءى جاڭا تۋعان نارەستە. بالالاردىڭ 80 پايىزىندا COVID-19 سيمپتومسىز ءارى جەڭىل فورمادا وتەدى. تەك 20 پايىزى ىندەتتى ورتاشا اۋىر جانە اۋىر فورمادا ەڭسەردى»، - دەدى ر. بورانبايەۆا.

بۇدان بولەك ول بالالار اراسىنداعى كاۆاساكي ءتارىزدى سيندروم تۋرالى ايتتى.

«2020 -جىلدىڭ ءساۋىر- مامىرىندا COVID-19 ىندەتىنە شالدىعۋ دەڭگەيى جوعارى بولعان ەلدەردە بالالار اراسىندا كوروناۆيرۋس ىندەتىن ەڭسەرگەننەن كەيىن پەدياتريالىق مۋلتيجۇيەلىك قابىنۋ سيندرومى فورماسىندا جاڭا اۋرۋ تىركەلە باستالدى. ول ۋاقىتشا COVID-19 ىندەتىمەن بايلانىستىرىلدى. وسى پاتولوگيا پوستينفەكتسيالىق سيندروم بولىپ سانالادى، COVID-19 عا شالدىققاننان كەيىن 3-5 اپتادان سوڭ بايقالادى. بۇعان ناۋقاستاردىڭ قانىنداعى انتيدەنەلەر دالەل بولادى. ونىڭ باسقاشا اتاۋى - كاۆاساكي ءتارىزدى سيندروم. ويتكەنى، ول كاۆاساكي اۋرۋىمەن كلينيكالىق جاعىنان ۇقساس، الايدا ءتيىستى ايىرماشىلىقتارى بار. ولاردىڭ نەگىزگىسىنە توقتالساق، كاۆاساكي اۋرۋى كىشكەنتاي بالالاردا بايقالادى، ياعني كوبىنە ەكى جاستاعىلار اراسىندا»، - دەدى دارىگەر.

ونىڭ ايتۋىنشا، مۋلتيجۇيەلىك قابىنۋ سيندرومىن ەمدەۋدەگى ەڭ باستىسى - ول ەرتە كەزەڭدە دياگنوستيكادان وتكىزۋ. كاۆاساكي ءتارىزدى سيندرومنىڭ نەگىزگى كلينيكالىق سيمپتومىنا توقتالساق، 24 ساعات ىشىندە دەنە قىزۋىنىڭ جوعارى بولۋى بايقالادى. مۋلتيجۇيەلىك قابىنۋ سيندرومىنا كۇدىك بولسا، بالانى اۋرۋحاناعا جاتقىزىلۋى كەرەك. بۇگىندە ەلىمىزدە بالالار اراسىندا كاۆاساكي ءتارىزدى سيندرومعا شالدىعۋدىڭ 16 وقيعاسى تىركەلدى. سونىڭ ىشىندە 8 بالا ەمدەلىپ شىقتى، ال قالعاندارى اۋرۋحانالاردا ەم قابىلداۋدا. ايتا كەتەيىك، دەنساۋلىق ساقتاۋ مينيسترلىگى بالالار اراسىندا COVID-19 ىندەتىن ەمدەۋدىڭ كلينيكالىق حاتتاماسىن ازىرلەدى. وسى ورايدا ريزا بورانبايەۆا قازاقستاندا ەندى 3 حاتتاما بولاتىنىن اتاپ ءوتتى. ءبىرىنشى حاتتاما ەرەسەكتەرگە، ەكىنشىسى جۇكتى ايەلدەرگە، سونداي- اق ءۇشىنشى حاتتاما بالالار اراسىنداعى COVID-19 ىندەتىنە ارنالعان.

«حاتتاما دايىن، ونى وسى اپتادا قاراستىرىپ، بەكىتەمىز دەپ ويلايمىن. اتاپ ايتقاندا، بالالاردى ەمدەۋ ءجۇرىپ جاتىر، سەبەبى COVID-19 دىڭ دياگنوستيكاسى مەن ەم- دوم شارالارى جالپى حاتتامادا بولدى. ءقازىر ءبىز ونى كەڭەيتىپ، جۇيەلەندىردىك، سونداي- اق مۋلتيقابىنۋ سيندرومىن (كاۆاساكي ءتارىزدى سيندروم) ەنگىزدىك. مەنىڭ ويىمشا، حاتتاما اپتا ىشىندە بەكىتىلەتىن بولادى»، - دەدى دارىگەر.