ەرلان قارين: ۇلتتىق كەڭەس - سىندارلى پىكىرتالاستار وتەتىن زياتكەرلىك الاڭ

«بۇعان دەيىن مالىمدەگەندەي، ۇلتتىق كەڭەستىڭ قىزمەتىنە قوعام بەلسەندىلەرىن تارتۋ ماقساتىندا ۇقسك قۇرامى مەرزىمدى تۇردە روتاتسيا جۇرگىزىپ وتىرادى. ۇلتتىق كەڭەسكە جالپى كۇن ءتارتىبىن جاڭارتىپ، جاڭا تاقىرىپتار مەن ۇسىنىستار ايتاتىن جاڭا بەلسەندىلەر مەن ساراپشىلار كەلۋى كەرەك. ۇلتتىق كەڭەستىڭ ەرەكشەلىگى دە وسىندا - بۇل سىندارلى پىكىرتالاستار وتەتىن جاندى جانە بەلسەندى زياتكەرلىك الاڭ»،- دەپ جازدى ەرلان قارين Telegram-داعى ءوز اككاۋنتىندا.

«وسىعان بايلانىستى ۇلتتىق كەڭەستىڭ قۇرامىنا جاڭا قوعام قايراتكەرلەرى مەن ساراپشىلار ەنگىزىلدى. اتاپ ايتقاندا، ۇلتتىق كەڭەسكە «دوس» تاۋەلسىز ءومىر ورتالىعى» مۇگەدەكتەر قوعامدىق بىرلەستىگىنىڭ ءتورايىمى دينا ەردىلدينوۆا، «Atameken Business» تەلەارناسىنىڭ باس ديرەكتورى قانات ساحاريانوۆ، الەۋمەتتىك كاسىپكەر ەمين اسكەروۆ، تانىمال جۋرناليست، بلوگەر وركەن كەنجەبەك جانە مەديا ساراپشى ماكسيم روجين كىردى. ءوز كەزەگىندە، روتاتسيا اياسىندا ۇلتتىق كەڭەس قۇرامىنان باعدات مۋسين، دانيار اشىمبايەۆ، مۇحتار تايجان، سەيداحمەت قۇتتىقادام جانە جانىبەك قوجىق شىعارىلدى. ارىپتەستەرىمە بىرلەسكەن بەلسەندى جۇمىس ءۇشىن العىس ايتقىم كەلەدى. ءبىر جىلدان از ۋاقىت ىشىندە ۇلتتىق كەڭەس اياسىندا ەلدىڭ ەكونوميكالىق، ساياسي جانە الەۋمەتتىك دامۋى سالاسىنداعى ماڭىزدى رەفورمالار جۇزەگە اسىرىلدى. ماڭىزدى زاڭدار مەن نورماتيۆتىك قۇقىقتىق اكتىلەردىڭ اۋقىمدى پاكەتى قابىلداندى. مامىر ايىندا ۇلتتىق كەڭەستىڭ ءۇشىنشى وتىرىسى ءوتىپ، ونىڭ قورىتىندىسى بويىنشا پرەزيدەنتتىڭ جاڭا باستامالارىن ىسكە اسىرۋ جونىندەگى جوسپار قابىلداندى. سونداي- اق، ۇقسك ءبىرقاتار مۇشەسىنىڭ ۇسىنىسى بويىنشا كەڭەس قۇرىلىمىندا مادەني- رۋحاني دامۋ ماسەلەلەرىن قاراستىراتىن تاعى ءبىر توپ قۇرىلادى»، - دەپ اتاپ ءوتتى ەرلان قارين.