ءۇشارال پوليسەيلەرى كىسى ءولىمىنىڭ ءىزىن سۋىتپاي اشتى

ساعات 03.30-دا الاكول ا پ ب كەزەكشى بولىمىنە ءۇشارال قالاسىنداعى اۋداندىق اۋرۋحانادان 21 جاستاعى تۇرعىننىڭ وق جاراقاتىمەن اۋرۋحاناعا جەتكىزىلگەنى تۋرالى حابارلاما كەلىپ تۇسكەن. العان جاراقاتتارىنىڭ سالدارىنان زارداپ شەگۋشى قايتىس بولدى.

وسى دەرەك قر قىلمىستىق كودەكسىنىڭ 24-بابىنىڭ 3-بولىگى، 99-بابىنىڭ 9-تارماعىنىڭ 2-بولىگى بويىنشا تىركەلگەن سوڭ پوليتسيا قىزمەتكەرلەرى وقيعانىڭ ءمان- جايىن انىقتاۋعا كىرىستى. - جەدەل- ىزدەستىرۋ شارالارى بارىسىندا ءۇش ساعات ىشىندە كورشى اۋىلدىڭ ەش جەردە جۇمىس ىستەمەيتىن وقيعا ورنىنان ءىز سۋىتقان 23 جاستاعى تۇرعىنى كۇدىككە ءىلىندى.

پوليتسەيلەر ا. وسپانوۆ، د. ءالىمجانوۆ سىندى جەدەل ۋاكىلدەر مەن ۋچاسكەلىك پوليتسيا ينسپەكتورى ن. قورابايەۆتىڭ ۇيلەسىمدى جۇمىسىنىڭ ارقاسىندا كۇن باتقاننان كەيىن قىلمىسقا قاتىسى بار تۇلعا قولعا ءتۇستى. ۇسىنىلعان بۇلتارتپاس ايعاقتار نەگىزىندە كۇدىكتى اۋىر قىلمىس جاساعانىن مويىندادى، - دەدى الاكول اۋداندىق پوليتسيا ءبولىمى باستىعىنىڭ ورىنباسارى سايات سلياموۆ.

قايعىلى جاعدايعا اكەپ سوققان اڭشى مىلتىعى ەكەنى انىقتالىپ، مىلتىق كۇدىكتىنىڭ ايعاقتارىن تەكسەرۋ بارىسىندا قىلمىس ورنىنىڭ ماڭىنداعى قاراۋسىز قالعان عيماراتتان تابىلدى. سونداي- اق، جالعىز ۇڭعىلى باسقا اڭشى مىلتىعى قامىس وسكەن سۋ استىنان شىعارىلدى.

- الدىن الا تەرگەۋ بارىسىندا اۋىر قىلمىسقا بارۋدىڭ نەگىزگى سەبەپتەرى جۇمىسى جوق جاستاردىڭ ەش سەبەپسىز كوشە قاڭعىرۋى. جاستار اراسىنداعى دورەكىلىك كيكىلجىڭگە ۇلاسىپ، سوڭى توبەلەس پەن ادام ولىمىنە اكەپ سوققان. قازىرگى ۋاقىتتا كۇدىكتى ازامات ۇستالىپ، ۋاقىتشا ۇستاۋ يزولياتورىنا قاماققا الىندى، - دەپ تولىقتىردى سايات سلياموۆ.