شارىن ۇلتتىق پاركىندە تۋريزم قالاي دامىتىلادى

«تۋريستەردىڭ جىل سايىنعى كەلۋىنىڭ وسۋىنە قاراماستان، دەمالۋ ءۇشىن قاراپايىم جاعدايلار مەن قاجەتتى ينفراقۇرىلىمنىڭ بولماۋىنا بايلانىستى ۇلتتىق پاركتەردەگى ەكولوگيالىق تۋريزم ءتيىستى دەڭگەيدە دامىماي وتىر. «شارىن» مەملەكەتتىك ۇلتتىق تابيعي پارك اۋماعىندا ءتورت تۋريستىك باعدار بار. 2019 -جىلدىڭ قورتىندىسى بويىنشا اتالعان باعدارلارمەن 20640 ادام ءجۇرىپ ءوتتى. تۋريستەرگە قىزمەت كورسەتۋ ناتيجەسىندە ۇلتتىق پاركتىڭ ارنايى شوتىنا 16 ميلليون 700 مىڭ تەڭگە ءتۇستى»، - دەدى ق ر ەكولوگيا، گەولوگيا جانە تابيعي رەسۋرستار ۆيتسە- ءمينيسترى ەرلان نىسانبايەۆ.

ونىڭ ايتۋىنشا، ۇلتتىق پاركتەگى تۋريزمنىڭ قازىرگى ينفراقۇرىلىمى زاماناۋي تالاپتارعا ساي كەلمەيدى. سونىمەن قاتار اتالعان پارك اۋماعىن دامىتۋعا ينۆەستورلار تاراپىنان قىزىعۋشىلىق تومەن بولىپ تۇر. ياعني، جۇمسالعان شىعىننىڭ ءوزىن- ءوزى اقتاۋ مەرزىمى ۇزاق. وسى ورايدا ءبىرقاتار ەلدەردىڭ تاجىريبەسى، ونىڭ ىشىندە ا ق ش- تاعى ۇلتتىق پاركتىڭ جۇمىسى، ەكوتۋريزمدى دامىتۋ باعىتىنداعى زاڭناماسى زەرتتەلدى.

«حالىقارالىق تاجىريبەنى ەسكەرە وتىرىپ، ۇلتتىق پاركتىڭ ەكولوگيالىق تۋريزمىن دامىتۋدىڭ قادامدارى ايقىندالدى. سونىمەن بىرگە، نەگىزگى ەكپىن تۋريستىك باعدارلاردى، سوقپاق جولدار جەلىسىن دامىتۋعا قويىلادى. سونداي- اق ساپارلاۋ ورتالىعىن، كەمپينگ، ەتنواۋىلداردى قۇرۋ ەسكەرىلگەن. ءبىز ءبىرىنشى كەزەكتە تۋريستىك باعدارلار مەن سوقپاق جولدارمەن ءجۇرىپ ءوتۋدى ناسيحاتتاۋىمىز كەرەك. وسى ورايدا ۇلتتىق پاركتىڭ ينفراقۇرىلىمىن دامىتۋ قادامدارىن وزگەرتۋدى جوسپارلاپ وتىرمىز»، - دەدى ۆيتسە- مينيستر.

ونىڭ سوزىنە قاراعاندا، «شارىن» ۇلتتىق پاركىندە جەكە ينۆەستيتسيالار تارتۋ ەسەبىنەن ەكوتۋريزمدى دامىتۋ قاراستىرىلعان. بۇل تۇرعىدا زاماناۋي ەكى ساپارلاۋ ورتالىعىن، جاياۋ جۇرگىنشىلەر ءۇشىن ءتورت باعداردى، ەتنواۋىلداردى، كورۋ الاڭدارىن جانە باسقا دا نىسانداردى قۇرۋ جوسپارلانعان. رەكرەاتسيالىق جۇكتەمەنى ازايتۋ ءۇشىن بارلىق نىساندار شاتقالدان تىس اۋماقتا ورنالاسادى. تۋريستەر ساپارلاۋ ورتالىعىنا كەلگەن كەزدە، وعان وسى اۋماق تۋرالى اقپارات بەرىلەدى. وسى رەتتە جاياۋ ءجۇرۋ، ۆەلوسيپەد باعدارلارى ايقىندالعان. ەكولوگيا مينيسترلىگىنىڭ مالىمەتىنشە، ۇلتتىق پاركتى دامىتۋ جوباسى اياسىندا الدان الا ەسەپتەۋلەر بويىنشا 3,6 ميلليارد تەڭگە قاجەت بولادى.