قازاقستاندا دارمەن ءسادۋاقاسوۆ كۋبوگىنا ارنالعان شاحمات تۋرنيرى وتەدى
قازاقستان رەسپۋبليكاسىنىڭ كونستيتۋتسياسى كۇنىنە ارنالعان جارىسقا 600 گە جۋىق قازاقستاندىق جاس دارىن قاتىسادى دەپ كۇتىلۋدە.
ءىس-شارانىڭ باستى مىندەتى - كارانتين جانە حالىقارالىق شەكارالار جابىق كەزەڭدە ساپالى تۋرنير تاجىريبەسىن قاجەت ەتەتىن وتاندىق تالانتتاردى قولداۋ. جارىس 2002-2005، 2006-2009-جىلدارى، سونداي-اق 2010-جىلى تۋعان جانە ودان كىشى جاستاعى ۇلدار مەن قىزدار اراسىندا وتەدى. جۇلدە قورى - 2,6 ميلليون تەڭگە. سونىمەن قاتار، ۇلدار مەن قىزدارعا جەكە سىيلىق تاعايىندالدى.
تۋرنير lichess.org ويىن الاڭىندا وتەدى. ويىن شۆەيتساريا جۇيەسى بويىنشا 9 تۋردان تۇرادى. ۋاقىتتى باقىلاۋ - پارتيانىڭ سوڭىنا دەيىن ءار قاتىسۋشىنىڭ جۇرىسىنە 15 مينۋت 10+ سەكۋند.
جارىسقا قاتىسۋ ءۇشىن وتىنىمدەر dscup2020@gmail.com ەلەكتروندى پوشتاسىنا قابىلدانادى، تىركەۋ مەرزىمى - نۇر-سۇلتان ۋاقىتىمەن 24- تامىز 18:00 گە دەيىن.
وتىنىشتە جەكە باسىن كۋالاندىراتىن قۇجاتتىڭ كوشىرمەسىن جانە ۇيالى تەلەفون ءنومىرىن قوسا كورسەتۋ قاجەت. بۇگىندە تۋرنيرگە 200 دەن استام ويىنشى تىركەلگەن. تۋرنيردىڭ باس تورەشىسى - حالىقارالىق تورەشى، فيدە شەبەرى ەرجان شاكەنوۆ.
انتيچيتەرلىك كوميسسيانى حالىقارالىق گروسسمەيستەر ءانۋار يسماعامبەتوۆ باسقارادى. كوميسسيانىڭ مىندەتى - ءادىل ويىندى قامتاماسىز ەتۋ جانە سىرتقى كەڭەستەر مەن كومپيۋتەرلىك باعدارلامالاردى قولدانۋعا بايلانىستى ءتۇرلى بۇزۋشىلىقتارعا جول بەرمەۋ.
الاياقتىقپەن كۇرەس - قازىرگى شاحماتتىڭ باستى ماسەلەسى. تىركەۋ، تورەشىلىك، جۇلدەلەردى ءبولۋ، تورەشىلەر مەن انتيچيتەرلىك كوميسسيانىڭ جۇمىسى تۋرالى تولىق اقپاراتتى جارىس ەرەجەسىنەن بىلۋگە بولادى.
