جيپپەن قاشقان ەسىرتكى وسىرۋشىلەردى پوليتسيا تىكۇشاقپەن قۋىپ ۇستادى

ەسىرتكى قىلمىسىنا قارسى ءىس-قيمىل دەپارتامەنتىنىڭ موبيلدى توبى جانە ءى ءى م- ءنىڭ ارنايى بولىنىستەرى قاراعاندى جانە قىزىلوردا وبلىستارىنىڭ شەكارالارىن تىكۇشاقپەن بارلاۋ كەزىندە قىزىلوردا قالاسىنان 320 ك م قاشىقتىقتا قولدان وسىرىلگەن قاراسورا پلانتاتسياسىن انىقتاعان.

سول جەردە سۋارۋعا ارنالعان باسسەين، اگروقۇرالداردى ساقتاۋعا جانە سول جەردە تۇرۋعا ارنالعان جەر ءۇي بولعان.

«پلانتاتسياعا جاقىن ۇشىپ بارۋ كەزىندە جالعان مەملەكەتتىك تىركەۋ نومىرلەرى تاعىلعان ەكى «Toyota Land Cruiser» جول تالعامايتىن كولىكتەرى بايقالدى. ولار تىكۇشاقتان ۇلكەن جىلدامدىقپەن قاشا باستادى. داۋىس زورايتقىش ارقىلى پوليتسيا قىزمەتكەرلەرىنىڭ توقتاۋ تۋرالى تالابىن ەلەمەدى. اۆتوكولىكتىڭ سوڭىنا تۇسكەن قىزمەتكەرلەر ونى توقتاتۋ ءۇشىن كولىكتىڭ الدىنا جانە بىرنەشە رەت دوڭگەلەكتەرىنە وق اتتى. دوڭگەلەكتەرىنە زاقىم كەلگەن سوڭ عانا ەكى كولىك قوزعالىسىن توقتاتتى. پوليتسيا قىزمەتكەرلەرى جەرگىلىكتى ءۇش تۇرعىندى ۇستادى. ولاردى ۇستاۋ كەزىندە بىرەۋى جاراقات الدى. وعان العاشقى مەديتسينالىق كومەك كورسەتىلدى جانە مەديتسينالىق مەكەمەگە جەتكىزىلدى. ونىڭ ومىرىنە قازىرگى ۋاقىتتا ەش قاۋىپ ءتونىپ تۇرعان جوق. اتالعان جەردە قىزىلوردا وبلىسىنىڭ پوليتسيا دەپارتامەنتىنىڭ جەدەل-تەرگەۋ توبى جۇمىس ىستەپ جاتىر»، - دەدى پوليتسيادان.

ەسكە سالايىق، رەسپۋبليكا اۋماعىندا 1- ماۋسىمنان باستاپ 30- قازانعا دەيىن «قاراسورا» ارنايى وپەراتسياسى وتكىزىلىپ جاتىر. ونىڭ شەڭبەرىندە قۇرامىندا ەسىرتكى بار وسىمدىكتەردىڭ زاڭسىز وسىرىلگەن القاپتارىن انىقتاۋ ءۇشىن تىكۇشاقتى پايدالانۋ، جوعارى جىلدامدىقتاعى اۆتوكولىكتەرى بار ءموبيلدى توپتاردى جۇمىلدىرۋ كوزدەلگەن.

وپەراتسيا باستالعالى بارلىعى 430 ەسىرتكى قىلمىسى انىقتالدى، ونىڭ ىشىندە 178 ءى - قۇرامىندا ەسىرتكى بار وسىمدىكتەردى زاڭسىز وسىرۋگە، 153 ءى - ساتۋعا، 83 ءى - ساقتاۋعا قاتىستى. سونداي-اق ەسىرتكى كونترابانداسىنىڭ 5 فاكتىسى انىقتالدى. زاڭسىز اينالىمنان جالپى 9 توننا ەسىرتكى الىندى.