توقايەۆ: باس پروكۋراتۋرا كاسىپكەرلەردى قۋدالاۋ فاكتىلەرىن شۇعىل جويىپ وتىرۋى ءتيىس
بۇل تۋرالى سىبايلاس جەمقورلىققا قارسى كۇرەس ماسەلەلەرى جونىندەگى كەڭەستە ءسوز سويلەگەن ق ر پرەزيدەنتى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
«ەكونوميكالىق پروبلەمالار اياسىندا كاسىپكەرلىككە قولداۋ كورسەتۋ ەرەكشە وزەكتىلىككە يە بولىپ وتىر. 5 جىلدىڭ ىشىندە زاڭدى كاسىپكەرلىك قىزمەتكە كەدەرگى كەلتىرۋ تۋرالى قىلمىستىق ءىس بويىنشا 11 تۇلعا، رەيدەرلىك تۋرالى ءىس بويىنشا 7 تۇلعا سوتتالدى. وسى ساننان- اق بيزنەستى قورعاۋدىڭ قۇقىق قورعاۋ تەتىكتەرى كىبىرتەكتەپ تۇرعانىن كورۋگە بولادى. دەگەنمەن، وتكەن جىلى مەن جولداۋىمدا زاڭدى بيزنەسكە كەدەرگى كەلتىرۋ اۋىر مەملەكەتتىك قىلمىس ەكەندىگىن ايتتىم. مىنە، وسىنى بارلىق قۇقىق قورعاۋ ورگاندارى، ونىڭ ىشىندە باس پروكۋراتۋرا دا قاپەردە ۇستاۋى ءتيىس. ۇكىمەتكە باس پروكۋراتۋرامەن بىرگە ءبىر مەرزىمدە قوزعالعان بارلىق ماسەلەلەر بويىنشا ناقتى ۇسىنىستاردى بەكىتۋگە ەنگىزۋدى تاپسىرامىن»، - دەدى قاسىم- جومارت توقايەۆ.
دەگەنمەن، مەملەكەت باسشىسى ناقتى پوزيتيۆ تەندەنسيانىڭ دا بار ەكەندىگىن اتاپ ءوتتى.
«ءبىز ەنگىزگەن سىبايلاس جەمقورلىققا قارسى سۇيەمەلدەۋ ينستيتۋتى العاشقى جەمىسىن بەرە باستادى. وسى جىلدىڭ ءبىرىنى جارتىجىلدىعىندا عانا 510 بيزنەس- جوبا بويىنشا زاڭسىز ارالاسۋدىڭ 114 فاكتىسى انىقتالدى. بۇل جۇمىستى جالعاستىرۋ قاجەت. باس پروكۋراتۋرا كاسىپكەرلەردى قىلمىستىق قۋدالاۋ وربيتاسىنا نەگىزسىز شىعارۋ فاكتىلەرىن شۇعىل جويىپ وتىرۋى ءتيىس. كاسىپكەرلەر، ينۆەستورلار جەمقورلىق قىسىمنان قۋاتتى قورعانىستى سەزىنە ءبىلۋى كەرەك»، - دەدى ق ر پرەزيدەنتى.
اۆتور: مارلان جيەمباي
