بەردىبەك ساپاربايەۆ: جاڭا وقۋ جىلىنا دايىندىق ءالسىز

ءوڭىر باسشىسى بەردىبەك ساپاربايەۆ وبلىس اكىمدىگىندە وتكەن جيىندا ءتيىستى باسقارمالاردىڭ جۇمىسىنا وسىنداي باعا بەردى، دەپ حابارلايدى قازاقپارات وبلىس اكىمدىگىنىڭ رەسمي سايتىنا سىلتەمە جاساپ.

«جاڭا وقۋ جىلىنا دايىندىق شارالارىنا بايلانىستى كوپتەگەن تاپسىرمالار بەرىلگەن بولاتىن. ناتيجەلەر كورسەتىپ وتىرعانداي، ول تاپسىرمالار ورىندالماعان. وڭىردە مەكتەپتەردىڭ قۇرىلىسى مەن كۇردەلى جوندەۋ جۇمىستارى جۇرگىزىلۋدە. بۇل جۇمىستارعا جەتكىلىكتى قارجى بولىنگەن. جوسپارعا سايكەس كوپتەگەن نىساندارداعى قۇرىلىستاردى 25 -تامىزعا دەيىن اياقتاۋ قاجەت. دەگەنمەن، مەنىڭ بايقاۋىمشا، نىسانداردىڭ قۇرىلىسى كۇزدە، وقۋشىلار مەكتەپكە بارۋعا ءماجبۇر بولعان كەزدە عانا اياقتالماق. كوبىسى وقۋ قاشىقتان وتەدى دەپ ۇمىتتەنۋدە. سوندىقتان ولار اسا اسىقپايدى. وسى ورايدا ءبىلىم بەرۋ سالاسىنداعى جۇمىستاردىڭ وتە ناشار جۇرگىزىلىپ جاتقانىن ايتا كەتۋ كەرەك. بۇل وقۋلىقتارمەن جانە كومپيۋتەرلەرمەن قامتاماسىز ەتۋگە دە قاتىستى»، - دەدى وبلىس اكىمى.

ءبىلىم باسقارماسىنىڭ باسشىسى گۇلنار قوجابەرگەنوۆا اتاپ وتكەندەي، قازىرگى تاڭدا وبلىستا 22 ءبىلىم بەرۋ نىسانىنىڭ قۇرىلىسى جۇرگىزىلۋدە، ولاردىڭ توعىزى بيىل سالىنىپ ءبىتۋى كەرەك. قۇرىلىس جۇمىستارىنا 10,1 ميلليارد تەڭگە ءبولىندى. 7,7 ميلليارد تەڭگەگە 42 مەكتەپ كۇردەلى جوندەۋدەن وتۋدە. ونىڭ 32-ىندەگى جوندەۋ جۇمىستارى 30 -تامىزعا دەيىن، ال التى مەكتەپتە كۇردەلى جوندەۋ تەك 30 -قىركۇيەكتە اياقتالماق.

«نەلىكتەن جۇمىس كەشىكتىرىلىپ جاتىر، نەگە اۋدان اكىمدىكتەرى تاراپىنان باقىلاۋ جوق؟ اۋدان اكىمدەرى، اكىمدىكتەردىڭ قۇرىلىس بولىمدەرىنىڭ باسشىلارى قايدا قاراپ ءجۇر! مەنىڭ تۇسىنۋىمشە، مەردىگەرلەرگە اسىعار ەمەس. جاڭا وقۋ جىلىنا از ۋاقىت قالعان كەزدە نەگە ءتيىستى شارالار قابىلدانبايدى؟» ، - دەدى ب. ساپاربايەۆ.

ءبىلىم باسقارماسىنىڭ باسشىسى نىسانداردىڭ قۇرىلىسى مەن جوندەۋ جۇمىستارىنىڭ سوزىلۋىن جۇمىسشىلاردىڭ جەتىسپەۋشىلىگىمەن ءتۇسىندىردى. ءبىلىم بەرۋ سالاسىنداعى تاعى ءبىر ماڭىزدى ماسەلە - سىرتتاعى مەكتەپ دارەتحانالارىنا قاتىستى. وبلىس اكىمىنىڭ تاپسىرماسى بويىنشا، ولاردىڭ ءبارى 1 - قىركۇيەككە دەيىن مەكتەپ عيماراتتارىنا ەنگىزىلۋى كەرەك ەدى. بۇل ءۇشىن 1,1 ميلليارد تەڭگە بولىنگەن. بەلگىلى بولعانداي، وسى ۋاقىتقا دەيىن 285 دارەتحانانىڭ تەڭ جارتىسى عانا كوشىرىلگەن. بۇل ورايدا بايزاق، قورداي، مەركى، شۋ اۋداندارى ايتارلىقتاي ارتتا قالىپ وتىر. ءوڭىر باسشىسى جىلى سانيتارلىق توراپتارمەن جابدىقتاۋداعى سىلبىر جۇمىستار بويىنشا قاتاڭ ەسكەرتۋلەر جاسادى.

«بۇل ءبىزدىڭ ءوزىمىزدىڭ بالالارىمىز. نەگە قۇرىلىس كەزىندە وسى تۋرالى ەشكىم ويلامايدى؟ نەلىكتەن دارەتحانالار اراسىندا بولىكتەر جاسالىنباعان؟ ءار دارەتحاناعا كەم دەگەندە ەكى ميلليون تەڭگە جۇمسالادى. بۇل قاراپايىم دارەتحانا سالۋ ءۇشىن شىنىمەن جەتكىلىكسىز بە؟ وقۋ جىلىنىڭ باستالۋىنا نەبارى 10 كۇن قالدى، ال جۇمىس اياقتالعان جوق. مەن اۋدان اكىمدەرىنىڭ قالاي تىنىش ۇيىقتايتىنىن تۇسىنبەيمىن»، - دەدى ءوڭىر باسشىسى.

سونىمەن قاتار ب. ساپاربايەۆ وبلىستاعى بارلىق مەكتەپتەردە بەينەباقىلاۋ كامەرالارىن ورناتۋدى تەزدەتۋدى تاپسىردى. بەلگىلى بولعانداي، بەينەكامەرالاردىڭ 80 پايىزى ەسكىرگەن دەسەك، ولاردى ساندىق كامەرالارعا اۋىستىرۋ كەرەك.