جاستار وزدەرىنە، جاقىندارى مەن قوعامعا جاناشىر بولۋى كەرەك - زيالى قاۋىم وكىلدەرى

اقىن، ق ر مەملەكەتتىك سىيلىعىنىڭ لاۋرەاتى، «قۇرمەت» جانە «پاراسات» وردەندەرىنىڭ يەگەرى تەمىرحان مەدەتبەك جاستار وزدەرىنە، تۋعان- تۋىستارىنا جانە قوعامعا جاناشىرلىق تانىتۋى كەرەك دەپ ەسەپتەيدى.

«دارىگەرلەردىڭ جۇمىسىنىڭ، حالىقتىڭ سانيتارلىق ەرەجەلەردى ساقتاۋىنىڭ ارقاسىندا ىندەت تاراۋى تەجەلە باستادى. ءبىراق ونىڭ سالدارى از ەمەس جانە كەز- كەلگەن ۋاقىتتا ءورشىپ كەتۋى مۇمكىن. ءار ادام اباي بولۋى كەرەك. كارانتين تالاپتارىن ودان ءارى دە مۇقيات بولعان ءجون. مەرەكەلەردى ۇيىمداستىرۋدان اۋلاق بولعان دۇرىس. اسىرەسە جاستار نەمقۇرايلىلىق تانىتپاۋى كەرەك. جاستار وزدەرىنە، تۋعان- تۋىستارىنا، قوعامعا جاناشىرلىق تانىتۋى كەرەك. جاستاردى شىدامدىلىققا شاقىرامىن. بولاشاق جاستاردىڭ قولىندا، سوندىقتان ولار 10 ەسە جاۋاپتى جانە مۇقيات بولۋلارى ءتيىس. بارلىق الماتىلىقتارعا جاقسىلىق، اماندىق تىلەيمىن!»، — دەدى تەمىرحان مەدەتبەك.

ءوز كەزەگىندە، تانىمال پروزاشى، دراماتۋرگ، پۋبليتسيست، سىنشى، قازاقستان جازۋشىلار وداعىنىڭ مۇشەسى، ق ر ەڭبەك سىڭىرگەن قايراتكەرى احمەتجان ءاشىروۆ الماتىلىقتاردى كارانتين رەجيىمىنىڭ جەڭىلدەتىلگەنىنە قاراماستان، سانيتارلىق تالاپتاردى قاتاڭ ساقتاۋعا شاقىردى.

«قازىر كارانتين ءبىتتى دەپ ايتا المايمىز. بۇل ىندەت ءالى جويىلعان جوق، سول سەبەپتى ءبارىمىز، جاس تا كارى دە، بەتپەردە تاعىپ ءجۇرۋىمىز كەرەك. ول ءوزىمىز ءۇشىن، ءبىر- ءبىرىمىزدى قورعاۋ ءۇشىن قاجەت. كارانتين ءالى دە بار. بۇل ۋاقىتشا شارا دەپ ەسەپتەيمىز. ماسكا تاقپاي جۇرەتىن كۇندەر الىس ەمەس دەپ ويلامىز. ءبىز، ۇلكەندەر ايتقان اقىلدى جاستار تىڭداۋى كەرەك. ساقتىق شارالارى ءوزىمىز ءۇشىن، بالالارىمىز، انالارىمىز بەن جاقىندارىمىز ءۇشىن، دەنساۋلىعىمىز جاقسى بولىپ، ءومىردى جاقسى وتكىزۋ ءۇشىن قاجەت. كارانتين ەرەجەسىنىڭ جەڭىلدەتىلگەنىنە ءبىز قۋاندىق. كوپ ۇزاماي ىندەت جوعالىپ، ۇكىمەت بولىپ، ەل بولىپ، ەلىمىز ءۇشىن بۇرىنعىداي ەڭبەك ەتەمىز دەپ ويلايمىن. ال قازىرگى تاڭدا، كارانتين ەرەجەسىن ۇستانىپ، ساقتىق شارالارىن قولدانىپ، تالاپ پەن كەڭەستەرگە باعىنىپ ءجۇرۋىمىز قاجەت. بۇل شارانىڭ بارلىعى ورتاق يگىلىكتەر ءۇشىن قولعا الىنىپ جاتىر»، - دەدى احمەتجان ءاشىروۆ.