ايدوس سارىم سانيتارلىق تالاپتارعا قاتىستى: ازاماتتار جاۋاپكەرشىلىكتى سەزىنۋى ءتيىس
نۇر- سۇلتان. قازاقپارات - قاتاڭ تۇردەگى العاشقى كارانتيننەن جانە ەكىنشىسىنەن ساباق الۋىمىز قاجەت. ەلىمىزدە شەكتەۋ شارالارىن كەزەڭ- كەزەڭىمەن الىپ تاستاۋعا قاتىستى ساياساتتانۋشى ايدوم سارىم وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
«قازىرگى ۋاقىتتا قوعام كوروناۆيرۋس ىندەتىنىڭ قاۋپىن سەزىنە باستادى. شىلدە ايىندا جاعداي ۋشىعا باستاعانداي بولىپ، ءتىپتى سپورتتىق ارەنالاردا اۋرۋ جۇقتىرىپ العاندارعا ارنالعان توسەك- ورىن جابدىقتالا باستادى. ال قازىرگى ۋاقىتتا جاعداي تۇراقتالىپ، اۋرۋ جۇقتىرعاندار مەن سونىڭ سالدارىنان كوز جۇمعاندار سانى ازايا باستادى. اۋرۋحانانىڭ ناۋقاستارمەن تولىپ قالماۋىن، ءدارى- دارمەكپەن، ماماندارمەن قامتاماسىز ەتۋ جاعىن تۇراقتاندىرۋ قولدان كەلدى»، - دەيدى ساياساتتانۋشى ايدوس سارىم.
ونىڭ ايتۋىنشا، ىندەتكە قاتىستى احۋال بۇدان ءارى قالاي ءوربيتىنىن ەشكىم بولجاپ ايتا المايدى.
«جاعداي بۇدان ءارى قالاي بولارىن ءسىرا، ەشكىم بولجاي الماس. وكپە جانە وزگە دە ماۋسىمدىق اۋرۋلار ءورشيتىن كۇز بەن قىستا نە بولارىن ەشكىم ايتا المايدى. بيلىك قايعىلى تاجىريبەدەن كەيىن بولۋى كەرەك، «كۇردەلى احۋالعا دايىندىق» جونىندە ايتىپ جاتىر. جانە بۇل، مەنمەندىك پەن بوركىن اسپانعا اتۋ كۇناسىنان، «ۆۋندەرۆاففە» نەمەسە «عاجايىپ ۆاكسيناعا» ۇمىتتەنۋدەن جاقسىراق. كوروناۆيرۋس ومىرىمىزدە ۇنەمى بولاتىنىن، ەرتە مە، كەش پە ءبارىمىز اۋىرىپ شىعۋ كەرەك ەكەنىمىزدى تۇسىنگەن شىعارمىز. ەندى بارىمىزدى الىپ قالۋعا كۇش سالۋىمىز كەرەك. سانيتارلىق شەكتەۋلەر بولسا دا ورتا جانە شاعىن بيزنەستى ىسكە قوسۋعا بارىنشا تىرىسۋ قاجەت. بيسنەس تە بۇدان بىلاي كوروناۆيرۋس جاعدايىنا بەيىمدەلە جۇمىس ىستەيدى. ياعني ماسكا تاعۋ رەجيمىن ساقتاپ، انتيسەپتيككە شىعىندانىپ، جۇمىسشىلار مەن تۇتىنۋشىلاردىڭ قاۋىپسىزدىگىن ساقتايتىن بولادى»، - دەيدى ايدوس سارىم.
ساياسات تانۋشى اتاپ وتكەندەي، قاتاڭ تۇردەگى العاشقى كارانتيننەن جانە ەكىنشىسىنەن ساباق الۋىمىز قاجەت.
«كارانتين ءار ادام ءۇشىن فيزيكالىق جانە پسيحولوگيالىق تۇرعىدا اۋىر. بۇل جاعداي الاياقتارعا جول اشپاۋى ءتيىس. بارلىق وزەكتى جانە ماڭىزدى باعىتتار ءتۇرلى قوعامدىق جانە پارلامەنتتىك باقىلاۋلارمەن قامتىلۋى كەرەك. سوڭىندا ازاماتتارىمىز بەن بيزنەستىڭ ءومىرىن قيىنداتقاننان گورى، بىرنەشە كوميسسيا قۇرىپ، شەنەۋنىكتەردىڭ ءومىرىن قيىنداتقان دۇرىسىراق. مەملەكەت ءوز جۇمىسىن بارىنشا اشىق، دۇرىس جاساۋى قاجەت. توي، بايقاۋ وتكىزۋ سياقتى اسا ۇلكەن ەرەجە بۇزۋشىلىق بولماسا - ايىپپۇل سالۋ، تەكسەرۋ جۇرگىزۋ بارىسىندا لاۋازىمدى تۇلعالار ءار بيزنەس سۋبەكتىسىنە بارىنشا ادامگەرشىلكپەن، تۇسىنىستىكپەن قاراعانى ءجون»، - دەيدى ول.
ونىڭ ايتۋىنشا، ازاماتتاردىڭ ءوزى جاۋاپكەرشىلىكتى سەزىنىپ، كورشىلەرى مەن الدىنان شىققان ادامداردان جەكە باس گيگيەناسىن جانە سانيتارلىق نورمالاردى ساقتاۋدى تالاپ ەتەتىندەي قوعامدىق پىكىر قالىپتاستىرۋى كەرەك. «جاعدايدى دۇرىس، ناقتى باعالايتىن كەزەڭ كەلەدى. حالىقتى الەۋمەتتىك تۇرعىدا وڭالتۋ ءۇشىن ەكونوميكالىق مودەرنيزاتسيانىڭ جاڭا مودەلى بولادى»، - دەيدى ايدوس سارىم.
ايتا كەتەيىك، مەملەكەتتىك كوميسسيانىڭ شەشىمىمەن 17- تامىزدان باستاپ قازاقستاندا كارانتين شارالارىن كەزەڭ- كەزەڭىمەن الىپ تاستاۋ جوسپارى بەكىتىلدى.
اۆتور: زارينا قاھارمان
