اباي قالشابەك: ءبىز ابايدى عىلىمي تۇرعىدا كوبىرەك تانۋمىز كەرەك
«ابايدىڭ تۋعان كۇنىن «اباي كۇنى» دەپ اتاۋ وتە ماڭىزدى دەپ ەسەپتەيمىن. ابايدىڭ شىعارماشىلىعىنا قازاق حالقىنىڭ، قازاقستاندىقتاردىڭ نازارىن اۋدارۋعا سەپتىگىن تيگىزەتىن شارا دەپ ويلايمىن. جالپى، عالىمدار تۇلعاتانۋ ءۇش كەزەڭنەن تۇراتىنىن ايتادى. ءبىرىنشى كەزەڭ - ميفتىك كەزەڭ، ياعني تۇلعا تۋرالى اڭىزدار تاراپ، جاقسى- جامان اڭگىمەلەر شىعا باستايدى. ەكىنشى كەزەڭ - كوركەمدىك كەزەڭ. بۇل كەزەڭدە تۇلعا تۋرالى كوركەم شىعارمالار جازىلا باستايدى. مىسالى، «اباي جولى» - تۇلعاتانۋدىڭ كوركەمدىك كەزەڭىنىڭ جارقىن ۇلگىسى. ءۇشىنشى كەزەڭ - عىلىمي كەزەڭ. «جالپى قازاق تاريحىندا تۇلعاتانۋدىڭ ءۇش كەزەڭىنەن تولىق وتكەن ءبىر عانا ادام بار، ول - اباي. بۇل - مەكەمتاس مىرزاحمەت ۇلىنىڭ پىكىرى»، - دەيدى اباي قالشابەك.
ونىڭ ايتۋىنشا، ابايدىڭ ءۇش كەزەڭىن جۇيەلەپ بەرگەن ادام - مۇحتار اۋەزوۆ، ءبىراق جالپى حالىقتىڭ اباي تۋرالى تانىمى ميفتىك كەزەڭنىڭ ار جاق- بەر جاعىندا ءجۇر. «كەيبىر ادام اباي تۋرالى كوركەم شىعارمالاردى وقىعان بولۋى مۇمكىن، ال عىلىمي نەگىزدە تانىپ ءبىلدى دەپ ايتا المايمىز. حالىق وعان ءالى جەتكەن جوق. ءدال قازىر ءبىز ابايدى عىلىمي، تەوريالىق تۇرعىدا تانۋ كەزەڭىنىڭ الدىندا تۇرمىز»، - دەيدى ابايتانۋشى.
ول 10 - تامىز - اباي كۇنى دەپ بەلگىلەنۋى قانشالىقتى ماڭىزدى ەكەنىن ايتتى.
«جاس ۇرپاق كىمدى ۇلگى تۇتۋ كەرەك دەگەن ماسەلەدە قاتتى شاتاسادى. مىسالى، كەنەنباي قوجابەكوۆ دەگەن قازاقتىڭ عاجاپ اكتەرى بار. ول «قىز جىبەك» فيلمىندە جىبەكتىڭ اكەسىنىڭ ءرولىن سومداعان. ونى تانيتىن جاستار قاتارى ساۋساقپەن سانارلىق قانا. جاستار ونى تانىماسا دا، گولليۆۋد جۇلدىزى توم حەنكستى بىردەن تانۋى مۇمكىن. ءوز تۇلعالارىمىزدى تانۋعا كەلگەندە دەڭگەيىمىز وتە تومەن. سوندىقتان 10 - تامىز - اباي كۇنى رەتىندە بەلگىلەنۋى وتە دۇرىس شەشىم. بۇل «قازاقتىڭ تۇلعاسى كىم؟» دەگەن سۇراقتىڭ جاۋابىن تابۋعا قاتتى ۇلەس قوساتىن شارا. ابايدىڭ شىن مانىندە ماڭىزدى ەكەنىن ەسكە سالۋ - تاۋەلسىزدىك كەزەڭىندەگى ەكىنشى، ءۇشىنشى بۋىن ءۇشىن وتە ماڭىزدى بولادى»، - دەيدى ول.
اۆتور: زارينا قاھارمان