ەۋروپا ليگاسى: بۇگىن قازاقستاندىق كلۋبتاردىڭ قارسىلاستارى انىقتالادى

نۇر-سۇلتان. قازاقپارات - بۇگىن شۆەيتساريانىڭ نون قالاسىندا فۋتبولدان UEFA ەۋروپا ليگاسى ءبىرىنشى ىرىكتەۋ ساتىسىنىڭ جەرەبەسى تارتىلادى، دەپ حابارلايدى قازاقپارات ءتىلشىسى.

جەرەبە تارتۋ ءراسىمى ەلوردا ۋاقىتىمەن 16.00 دە باستالادى. تىكەلەي تەلەكورسەتىلىم UEFA رەسمي سايتىندا جۇرگىزىلەدى.

ەستەرىڭىزگە سالا كەتەلىك، بيىل ەۋروپا ليگاسىندا ەلىمىزدىڭ اتىنان الماتىنىڭ «قايرات»، شىمكەنتتىڭ «ورداباسى» جانە قىزىلوردانىڭ «قايسار» كوماندالارى باق سىنايدى.

«قايرات» پەن «ورداباسى» جارىستى ءبىرىنشى ساتىسىنان باستاسا، «قايسار» ەكىنشى ساتىسىندا العاشقى قارسىلاسىمەن شەبەرلىك بايقاسادى.

بيىل ەۋروپا ليگاسىندا ىرىكتەۋ كەزەڭىندە جەڭىمپاز ءبىر عانا ويىننان انىقتالادى. كەزدەسۋدە تەڭ ناتيجە تىركەلگەن جاعدايدا جارىستىڭ كەلەسى ساتىسىنا بەرىلەتىن جولداما يەسى قوسىمشا كەزەڭ نەمەسە پەنالتي سەرياسى ارقىلى بەلگىلى بولادى.

ايتا كەتەلىك، 9 - تامىزدا چەمپيوندار ليگاسىندا سىنعا تۇسەتىن ەلوردالىق «استانا» كومانداسىنىڭ قارسىلاسى انىقتالدى.