ماجارستاندا الەمدەگى ەڭ ۇلكەن كيىز ءۇي تىگىلەدى
بۇل تۋرالى قازاقپارات شارا ۇيىمداستىرۋشىلارىنا سىلتەمە جاساپ حابارلايدى.
باستاۋىن 2007-جىلدان العان حالىقارالىق شاراعا كۇللى تۇركى-عۇن ۇرپاعىنىڭ وكىلدەرى قاتىسادى. قۇرىلتاي اياسىندا ەجەلگى كوشپەندىلەردىڭ دالا مادەنيەتى، قولونەرى مەن وركەنيەتى، ۇلتتىق سپورت تۇرلەرى، تۇرمىس-سالتى كورسەتىلەدى.
سونىمەن قاتار، وسى سالادا ەڭبەكتەنىپ جۇرگەن عالىمداردىڭ زەرتتەۋلەرى ورتاعا سالىنىپ، ءوزارا تاجىريبە الماسىلادى. قۇرىلتاي-2020 باعدارلاماسىنىڭ ەرەكشەلىگى سول، وندا بيىل الەمدەگى ەڭ ۇلكەن كيىز ءۇي تىگىلەدى. كيىز ۇيگە ۇلى دالا قولباسشىسى اتيللا (ەدىل قاعان) ەسىمى بەرىلگەن.
بيىكتىگى 7 مەتر، ديامەترى 20 مەتر بولاتىن كيىز ءۇيدىڭ نەگىزگى ەرەكشەلىگى ونىڭ جينالمالىعىندا جانە كونە عۇن ءداستۇرى بويىنشا جابدىقتالعانىندا. ءۇيدى بەزەندىرۋشى عالىمدارىڭ ايتۋىنشا، كيىز ءۇيدىڭ ىشىنەن ارحەولوگيالىق، انتروپولوگيالىق زەرتتەۋلەر بارىسىندا تابىلعان كونە مۇراعاتتار كورمەسىن تاماشالاۋعا بولادى.
قۇرىلتايدىڭ تاعى ءبىر ەرەكشەلىگى، شارا قاتىسۋشىلارى مەن كەلگەن قوناقتار، مۇمكىندىگىنشە، ۇلتتىق كيىمىن كيىپ، ورتا عاسىرداعى (9-10 ع ع.) قارۋ-جاراق، قۇرال-سايمان، اشەكەيلەرىن كورسەتۋگە تىرىسادى. الەمدەگى سوڭعى جاعدايلارعا بايلانىستى بيىل قازاقستاننان رەسمي دەلەگاتسيا كەلمەسە دە، ماجارستانداعى قازاق دياسپوراسى مەن ستۋدەنتتەرى كومەگىمەن قازاق مادەنيەتى مەن سالتىن تانىتاتىن باعدارلاما دايىندالۋدا.
بيىلعى قۇرىلتايعا كارى قۇرلىقتىڭ كوپتەگەن مەملەكەتىندە تۇرىپ جاتقان قانداستارىمىز كەلەدى دەپ جوسپارلانۋدا. شارا ۇرپاق ساباقتاستىعى مەن ۇلىستار دوستىعىنىڭ بەكۋىنە ىقپال ەتەدى.
تاعى ءبىر ايتا كەتەرلىگى، ماجارستان ۇكىمەتى جاريالاعان ەپيدەميولوگيالىق قاۋىپسىزدىك ەرەجەلەرىنە سايكەس، بيىلعى قۇرىلتاي دەنساۋلىق ساقتاۋ شارالارىن ەسكەرە وتىرىپ، اشىق الاڭدا وتەدى. «ماجار-تۇران» حالىقارالىق قورىنىڭ نەگىزگى ماقساتى - ەرتە تۇركى-عۇن مادەنيەتىن جاڭعىرتۋعا عىلىمي ورتانى تارتۋ، سول سالاداعى عىلىمي زەرتتەۋلەر ارقىلى كوپشىلىككە تاريحي تامىرلاستىقتى تانىتۋ.
ەستەرىڭىزگە سالا كەتەيىك، تۇركى حالىقتاردىڭ ۇلكەن كۇرىلتايى - كوشپەندىلەر وركەنيەتىن تانىتاتىن ەۋروپاداعى ەڭ ءىرى شارا. تۇڭعىش قازاق-ماجار قۇرىلتايى «عاسىردان كەيىنگى كەزدەسۋ» دەگەن تاقىرىپپەن قازاقستاندا وتسە (قوستاناي وبلىسى، قازاقستان، 2007 ج.)؛ ەكىنشىسى 2008-جىلى ماجارستاننىڭ ءبوستورپۋستا اۋماعىندا ۇيىمداستىرىلدى. ءۇشىنشىسى «تۇران حالىقتارىنىڭ قۇرىلتايى» دەگەن اتاۋمەن 2010-جىلى ماجارستاننىڭ بۋگاتس مەكەنىندە ءوتتى. سودان بەرى تۇركى حالىقتاردىڭ ۇلكەن كۇرىلتايى ءداستۇرلى شارا رەتىندە ءار ەكى جىلدا ءبىر رەت ۇيىمداستىرىلىپ كەلەدى.