الماتى ءوڭىرىنىڭ اۋە شابۋىلىنا قارسى قورعانىس جۇيەسىنە كەنەت تەكسەرىس جۇرگىزىلدى
«قورعانىس ءمينيسترى نۇرلان ەرمەكبايەۆتىڭ نۇسقاۋى بويىنشا اۋە شابۋىلىنا قارسى قورعانىس بولىمدەرىنىڭ تۇراقتى جاۋىنگەرلىك ازىرلىگىن تەكسەرۋ ماقساتىندا تۇتقيىلدان شابۋىل جاساۋ فاكتورىن پايدالانا وتىرىپ، اۋەايلاقتاردان اۋە كەڭىستىگىن بۇزعان شارتتى قارسىلاسقا بارىنشا جاۋىنگەرلىك جاعدايعا جاقىن بولا وتىرىپ سوققى بەرەتىن جانە بارلاۋ پيلوتسىز اپپاراتتار ۇشىرىلدى. ءا ش ق ق اسكەرلەرىنىڭ باس كوماندالىق پۋنكتىندە اۋە شابۋىلىنا قارسى قورعانىس بولىمشەلەرىنىڭ كەزەكشى كۇشتەرىنىڭ ءىس-قيمىلىن ءمينيستردىڭ ءبىرىنشى ورىنباسارى- ق ر ق ك باس شتابىنىڭ باستىعى گەنەرال-لەيتەنانت مۇرات بەكتانوۆ باقىلاپ وتىردى»، دەلىنگەن حابارلامادا.
تەكسەرۋ كەزىندە اۋە شابۋىلىنا قارسى قورعانىس اسكەرىنىڭ كەزەكشى كۇشتەرى بيىكتە ەمەس وتە الاسا ۇشاتىن اۋە نىسانىن انىقتاپ، ولاردى اۋە كەڭىستىگىن بۇزۋشى رەتىندە تانىپ، زەنيتتىك زىمىران بولىمشەسىنىڭ قارۋىمەن (شارتتى تۇردە) جويۋى ءتيىس. الماتى وڭىرلىك گارنيزونىنىڭ ءا ش ق ق اسكەرلەرى بولىمدەرىنىڭ كەزەكشى قۇرالدارى انىقتاۋ جانە الىپ ءجۇرۋ الگوريتمىن ورىنداي وتىرىپ، ناقتى ۋاقىت رەجيمىندە ىقتيمال اۋە قارسىلاسىنىڭ ۇشۋ اپپاراتىن (شارتتى تۇردە) جويدى.
جاۋىنگەرلىك جۇمىستىڭ تيىمدىلىگى ءۇشىن شارتتى جاۋدى اسپانعا ۇستاۋعا جاقىن ماڭداعى اۆيابازادان جويعىش ۇشاقتار دا كوتەرىلدى. وقۋ-جاۋىنگەرلىك تاپسىرما پىسىقتالدى.
سونىمەن قاتار، كوميسسيا شاعىن كولەمدەگى نىسانداردى، ونىڭ ىشىندە پيلوتسىز ۇشۋ اپپاراتتارىن ۇستاۋ جانە جويۋعا قاتىستى اۋە شابۋىلىنا قارسى قورعانىستى ۇيىمداستىرۋداعى جەكەلەگەن كەمشىلىكتى انىقتادى.
تەكسەرۋ ناتيجەسى بويىنشا ەسەپتەر مەن ەكيپاجداردىڭ ءىس-قيمىلىنا نەعۇرلىم ەگجەي-تەگجەيلى تالداۋ جۇرگىزىلەدى جانە ءا ش ق ق جۇيەسىن جەتىلدىرۋ جونىندەگى شارالار كەشەنى ازىرلەنەدى.
اۋە شابۋىلىنا قارسى قورعانىس اسكەرلەرى اۋە كەڭىستىگىن پايدالانۋ ءتارتىبىنىڭ ساقتالۋىن ۇزدىكسىز باقىلاۋدى جۇزەگە اسىرا وتىرىپ، تاۋلىك بويى جاۋىنگەرلىك كەزەكشىلىك اتقارادى.
