بەيرۋتتاعى جويقىن جارىلىستىڭ نەدەن بولعانى انىقتالدى

بەيرۋت. BBC - قازاقپارات - ليۆان استاناسى بەيرۋت پورتتا بولعان ەكى جارىلىس سالدارىنان 78 ادام قازا تاۋىپ، 4 مىڭنان استام ادام جاراقات العان، قالانىڭ بىرنەشە اۋدانى تولىقتاي قيراعان.

بيلىك مالىمدەمەسىنە سايكەس، امموني نيتراتىنىڭ ۇلكەن پارتياسى (اممياك سەليتراسى دەپ تە اتالادى) پورتتا ۇزاق ۋاقىت قاۋىپسىزدىك شارالارىنسىز ساقتالعاننان كەيىن جارىلعان، دەپ حابارلايدى قازاقپارات BBC گە سىلتەمە جاساپ.

جارىلىستىڭ كوپتەگەن كۋاگەرلەرى الەۋمەتتىك جەلىلەردە پورتتىڭ ۇستىندە الدىمەن ءتۇتىنى كورىنىپ، سودان كەيىن جويقىن جارىلىس بولعانى، كەيىننەن قالانى ساڭىراۋقۇلاق ءتارىزدى بۇلت باسقانى ءتۇسىپ قالعان كادرلاردى جاريالادى.

جارىلىس تولقىنى كوپتەگەن عيماراتتاردى، سونىڭ ىشىندە پورتتان بىرنەشە شاقىرىم قاشىقتىقتا ورنالاسقان نىسانداردى دا قيراتىپ، كولىكتەرگە دە زيان كەلتىرگەن.

جەرگىلىكتى بۇقارالىق اقپارات قۇرالدارىنىڭ حابارلاۋىنشا، زارداپ شەككەندەردىڭ سانى ءالى ارتۋى مۇمكىن، ويتكەنى ادامدار عيمارات قيراندىلارىنىڭ استىندا قالعان.