بەيرۋتتاعى جارىلىس: الەم ەلدەرى ليۆانعا كومەك بەرۋگە دايىن
ەسكە سالا كەتەيىك، 4- تامىزدا ليۆاننىڭ اسكەري-تەڭىز كۇشتەرى (ا ت ك) بازاسىنا جاقىن بەيرۋت پورتى اۋدانىندا جويقىن جارىلىس بولعان ەدى. 5- تامىز كۇنى بەيرۋت ۋاقىتىمەن ساعات 00:30 دا ليۆاننىڭ دەنساۋلىق ساقتاۋ ءمينيسترى مۇحاممەد حاسان جارىلىستان قازا تاپقاندار سانى 70 كە جەتكەنىن، 4 مىڭعا جۋىق تۇرعىن جاراقات العانىن حابارلادى.
قۇتقارۋ جۇمىستارى ءالى دە جالعاسۋدا. اق ءۇي ا ق ش- تىڭ بەيرۋتتاعى جارىلىستى مۇقيات قاداعالاپ وتىرعانىن ايتتى.
ا ق ش مەملەكەتتىك دەپارتامەنتىنىڭ وكىلى قۇراما شتاتتاردىڭ بەيرۋتتاعى جارىلىس تۋرالى حابارلامالاردى مۇقيات باقىلاپ وتىرعانىن جانە «قولدان كەلگەن بارلىق كومەكتى» كورسەتۋگە دايىن ەكەنىن مالىمدەدى.
ا ق ش مەملەكەتتىك دەپارتامەنتىندە جارىلىستىڭ سەبەپتەرى تۋرالى اقپارات جوق جانە زارداپ شەككەندەردىڭ اراسىندا امەريكالىقتاردىڭ بار-جوعىن انىقتاۋ ءۇشىن جەرگىلىكتى بيلىكپەن جۇمىس جۇرگىزىلۋدە.
كاتار ءامىرى شەيح تاميم بين حاماد ءال-تاني ليۆان پرەزيدەنتى ميشەل اۋنعا قوڭىراۋ شالىپ، دەرەۋ ليۆانعا جەدەل قۇرىلاتىن اۋرۋحانالاردى جىبەرۋدى بۇيىردى.
«ليۆانداعى جارىلىس وتە ۇلكەن الاڭداۋشىلىق تۋدىردى، بىزدە نە بولعانى تۋرالى جانە ونىڭ سەبەبى نەدە ەكەنى، ول كەزدەيسوقتىق پا، الدە ادامنىڭ جاساعان ارەكەتى مە، ەشقانداي اقپارات جوق. سوندىقتان ولارعا جاۋاپ بەرۋ ءۇشىن بىزگە بۇل اقپارات قاجەت»، - دەدى ب ۇ ۇ باس حاتشىسى رەسمي وكىلىنىڭ ورىنباسارى فارحان حاك.
فرانسيانىڭ سىرتقى ىستەر ءمينيسترى جان-يۆ لە دريان فرانسيا ليۆاندى جانە ليۆاندىقتاردى ءارقاشان دا قولدايتىنىن مالىمدەدى.
«فرانسيا ليۆان بيلىگىنىڭ قاجەتىنە قاراي كومەك كورسەتۋگە دايىن»، - دەپ جازدى لە دريان Twitter پاراقشاسىندا.
تۇركيانىڭ پرەزيدەنتى رەجەپ ەردوعان ءوز ەلىنىڭ ليۆانعا تولىقتاي قولداۋ بىلدىرەتىنىن جانە وسى قيىن جاعدايدا ليۆان حالقىنا قاجەتتى كومەك كورسەتۋگە دايىن ەكەنىن مالىمدەدى.
تۇركيا مەن يراننىڭ سىرتقى ىستەر مينيسترلىكتەرى جارىلىس سالدارىنان قازا تاپقاندار مەن زارداپ شەككەندەردىڭ كوپتىگىنە بايلانىستى ليۆان حالقىنا قايعىرىپ كوڭىل ايتىپ، جارالانعانداردىڭ تەزىرەك ساۋىعىپ كەتۋىن تىلەدى.
كرەمل مالىمدەمەسىندە پرەزيدەنت ۆلاديمير پۋتين ميشەل اۋنعا كوڭىل ايتۋ جەدەلحاتىن جولدادى.
وندا ليۆانداعى جارىلىستىڭ زارداپتارىن جويۋعا ماسكەۋدىڭ قولداۋ كورسەتۋگە دايىن ەكەنىن باسا ايتتى.
ۇلى بريتانيانىڭ پرەمەر-ءمينيسترى بوريس دجونسون دا ۇلى بريتانيا ليۆانعا كەز-كەلگەن جولمەن قولداۋ كورسەتۋگە دايىن ەكەنىن مالىمدەدى جانە زارداپ شەككەندەرگە كوڭىل ايتتى.
ەۋرووداقتىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى جوزەپ بوررەلل ليۆان بيلىگى مەن حالقىنا كوڭىل ايتتى.
يوردانيانىڭ سىرتقى ىستەر ءمينيسترى ايمان سافادي ونىڭ ەلى بەيرۋت پورتىنداعى جارىلىستان كەيىن ليۆانعا قاجەت كەز-كەلگەن كومەكتى كورسەتۋگە دايىن ەكەنىن مالىمدەدى.
يراك پرەمەر-ءمينيسترى مۇستافا ءال-كازەمي يراك ۇكىمەتى مەن حالقىنىڭ ليۆانمەن بىرگە ەكەنىن، يراكتىڭ ليۆان حالقىن قازىرگى قيىن جاعدايدا قولداۋعا دايىن ەكەنىن باسا ايتتى.
ايتا كەتەيىك، قازاقستاننىڭ س ءى م ليۆانداعى جارىلىس سالدارىنان قازاقستاننىڭ ديپلوماتيالىق ميسسياسى عيماراتىنا زيان كەلگەنىن حابارلاعان بولاتىن.
جارىلىس كەزىندە ديپلوماتيالىق ميسسيانىڭ قىزمەتكەرلەرى جۇمىس كۇنى اياقتالعاننان كەيىن جۇمىس ورنىنان كەتىپ قالعان. كونسۋل جۇمىستا قالعان بولاتىن جانە جارىلىس تولقىنى سالدارىنان جەڭىل جاراقات الدى.
