ەڭ باستى قۇندىلىق - ادامنىڭ ءومىرى - زارەما شاۋكەنوۆا
«بۇگىن مەملەكەت باسشىسى قاسىم-جومارت توقايەۆ ەلدەگى ەپيدەميولوگيالىق احۋالدىڭ پروبلەمالىق ماسەلەلەرى بويىنشا كەڭەس وتكىزدى. پرەزيدەنت تاپسىرمالارىنىڭ ارقاسىندا سوڭعى ەكى اپتادا جاعداي تۇراقتاندى، ال ىندەتكە قارسى ءىس- قيمىل شارالارى ءتيىستى دەڭگەيگە شىعىپ كەلەدى. الايدا، ارقانى كەڭگە سالۋعا ءالى دە ەرتە. سوندىقتان شىلدە ايىندا ەنگىزىلگەن شەكتەۋ شارالارىنىڭ وڭ اسەرىن ودان ءارى نىعايتۋ ماقساتىندا جانە شەكارالاس ەلدەردە كورونوۆيرۋس ينفەكسياسىمەن بايلانىستى جاعدايدىڭ اسقىنۋ ىقتيمالدىلىعىن ەسكەرە وتىرىپ، پرەزيدەنت مەملەكەتتىك كوميسسياعا كارانتيندىك شارالاردى ەكى اپتاعا ۇزارتۋدى، كەيىننەن كەزەڭ- كەزەڭىمەن جەڭىلدەتۋدى تاپسىردى»، - دەيدى ساراپشى.
ونىڭ ايتۋىنشا، كوروناۆيرۋس ءارى ۇزاق ۋاقىت بىزبەن بىرگە بولادى. تيىسىنشە، مەملەكەتكە دە، ازاماتتاردىڭ وزىنە دە تۇسەتىن جاۋاپكەرشىلىك ارتادى. مۇندا جاعدايدى تۇراقتاندىرۋ ءۇشىن كەشەندى شارالار قاجەت.
«مەملەكەت كورسەتكەن دۇرىس جانە اشىق اقپاراتتىق ساياسات، ۋاقىتىلى جانە جان- جاقتى الەۋمەتتىك- مەديتسينالىق قولداۋ ءبىزدىڭ - قازاقستان ازاماتتارىنىڭ جاعدايدىڭ جاقسارۋىنا دەگەن سەنىمىن نىعايتادى. پروۆيزورلىق جانە ينفەكسيالىق ستاتسيونارلار بولىگىنىڭ جابىلۋى تۋرالى حابارلاندى جانە باسقالارىندا ورىن سانى قىسقارۋدا. ياعني، جاعداي تۇراقتانىپ كەلەدى. بۇل - ۆيرۋسپەن كۇرەسۋدەگى جەتىستىكتەرىمىزدى كورسەتەتىن ماڭىزدى جاڭالىق. الايدا، ءبىز ءالى دە اقپاراتتىق الاڭعا تاۋەلدىمىز، سوندىقتان كەلىپ تۇسكەن اقپارات پەن جاڭالىقتاردى سۇزگىدەن وتكىزىپ، دۇرىس باعالاۋدى ۇيرەنۋ ماڭىزدى. بۇل ءوزىڭىزدى جانە جاقىندارىڭىزدى جالعان جاڭالىقتاردىڭ جاعىمسىز اسەرىنەن قورعاۋعا مۇمكىندىك بەرەدى. سوندىقتان ۇكىمەت وتىرىسىندا وسى كۇردەلى كەزەڭدە اقپاراتتىق- ءتۇسىندىرۋ جۇمىستارىن كۇشەيتۋ قاجەتتىگى ايتىلدى»، - دەيدى ز. شاۋكەنوۆا.
سونىمەن بىرگە، ازاماتتاردىڭ ءوزارا قولداۋى دا ەرەكشە ماڭىزدى. تۇرعىندار ينتەرنەت، ءموبيلدى جانە ونلاين بايلانىس ارقىلى ءبىر- بىرىنە قولداۋ كورسەتە الادى.
«مۇلدەم بەيتانىس ادامنان دا قولداۋ كەلۋى مۇمكىن. بارلىعىمىز ازاماتتاردىڭ بىرەۋدىڭ قايعىسىنا بەي- جاي قاراماستان قانشالىقتى تەز جۇمىلاتىنىنا كۋا بولدىق. الەۋمەتتىك جەلىلەر ارقىلى ولار بىرنەشە ساعات ىشىندە ماتەريالدىق، مەديتسينالىق جانە ءدارى- دارمەكتەردى ىزدەۋگە كومەكتەستى. ءقازىر كوپتەگەن ادامدار ىندەتپەن كۇرەستى سوعىسپەن سالىستىرادى جانە بۇل بەلگىلى ءبىر دارەجەدە شىندىققا جاقىن. COVID-19 كورىنبەيتىن جاۋ رەتىندە، ءبىر مەملەكەتكە عانا ءقاۋىپ ءتوندىرىپ قويماي، تۇتاس الەمدى قۇرساۋعا الدى. بۇكىل الەم كوروناۆيرۋس ىندەتىنىڭ ەكىنشى تولقىنى بولاتىنىن ايتىپ وتىر. جاقىندا عانا بىرنەشە مەملەكەت، ونىڭ ىشىندە قازاقستان قاتاڭ كارانتيندىك شارالاردى جەڭىلدەتە باستاعان ەدى. كەيىن قانداي دا ءبىر ەلدەردىڭ باسقالارعا قاراعاندا تابىستى كۇرەسىپ جاتىر دەپ ايتۋعا ءالى ەرتە ەكەنى بايقالدى. ويتكەنى تاجىريبەسى باستاپقىدا دۇرىس بولىپ كورىنگەن مەملەكەتتەر دە قازىرگى ۋاقىتتا سانيتارلىق- كارانتيندىك تالاپتاردى كۇشەيتۋگە ءماجبۇر»، - دەدى ق س ز ي باسشىسى.
پرەزيدەنت كارانتيندى ۇزارتا وتىرىپ، كوروناۆيرۋستىق ينفەكسيا جۇقتىرۋ مەن ءولىم- ءجىتىم كورسەتكىشتەرىن ودان ءارى تومەندەتۋدىڭ ايرىقشا ماڭىزدىلىعىن اتاپ ءوتتى.
«ۇزاققا سوزىلعان كارانتيندىك شارالار ارينە، قوعامعا، ادامدارعا جانە ولاردىڭ كوزقاراستارىنا اسەر ەتەدى. ىندەتتىڭ كەلۋىمەن جانە ونىڭ سالدارى مەن باستان كەشكەن قايعىلى تاجىريبەنى ەسكەرە وتىرىپ، ءارقايسىمىزدا مورالدىق، قۇندىلىقتى قايتا باعالاۋ پروتسەسى ءجۇرىپ جاتىر. ەڭ باستى قۇندىلىق - ادامنىڭ ءومىرى. ول ءۇشىن كارانتيندى ۇزارتۋدى قولداۋ كەرەك جانە بارلىق كارانتيندىك نورمالاردى ساقتاۋ قاجەت، بۇل - ۆيرۋستىق ينفەكسيانىڭ جاپپاي تارالۋىن بولدىرماۋدىڭ باستى ءتاسىلى. سوندىقتان ءارقايسىمىزدىڭ وزىمىزگە جانە جاقىندارىمىزعا جانە باسقالاردىڭ ومىرىنە دەگەن جەكە جاۋاپكەرشىلىگىمىز بولۋى كەرەك جانە وسى نورمالارمەن ءومىر ءسۇرۋدى ۇيرەنۋىمىز كەرەك. «ساقتانعاندى قۇداي ساقتايدى» دەگەن ءسوز بار. ماڭىزدى باسىمدىقتاردىڭ ءبىرى - ۇلتتىڭ دەنساۋلىعى بولۋى كەرەك جانە ءارقايسىمىز ونى ساقتاۋعا تىرىسۋىمىز قاجەت»، - دەدى زارەما شاۋكەنوۆا.
اۆتور: ايجان سەرىكجان قىزى
