بەس مىڭ الماتىلىق الەمنىڭ بەدەلدى ج و و-لارىندا تەگىن ءبىلىم الۋ مۇمكىندىگىنە يە بولدى
بۇل تۋرالى وڭىرلىك كوممۋنيكاتسيالار قىزمەتىنىڭ الاڭىندا وتكەن ونلاين بريفينگتە الماتى قالالىق سيفرلاندىرۋ باسقارماسىنىڭ باسشىسى بايان قوڭىربايەۆ مالىمدەدى، دەپ حابارلايدى قازاقپارات ءتىلشىسى.
بۇگىندە وقۋ ورنىندا ءبىلىم الۋ ءۇشىن دارىستەر مەن پراكتيكالىق ساباقتارعا كۇندەلىكتى بارۋ قاجەت ەمەس. ەلدە ىندەت تاراپ جاتقان تۇستا ونلاين فورماتتىڭ وزەكتىلىگىنە تاعى ءبىر كوز جەتكىزدىك. ۇيدەن شىقپاي-اق وقىپ، ءبىلىم الۋعا بولاتىن كوپتەگەن ۆەب-سايتتار مەن قىزمەتتەر بار. بۇل قىزمەتتەردىڭ ىشىندەگى ەڭ ۇلكەنى جانە بەدەلدىسى - Coursera سايتى بولىپ تابىلادى. «الماتىنىڭ سيفرلاندىرۋ باسقارماسى مەن جۇمىسپەن قامتۋ ورتالىعى Coursera كومپانياسىمەن الەمنىڭ جەتەكشى ۋنيۆەرسيتەتتەرىنە 5 مىڭ ستۋدەنتتى اقىسىز قابىلداۋ تۋرالى كەلىسىمگە قول جەتكىزدى. كەلىسىمگە سايكەس 2020 -جىلدىڭ 31-جەلتوقسانىنا دەيىن الماتىلىقتار تەگىن ءبىلىم الا الادى. بۇل مۇمكىندىك تىركەۋ پروتسەسىن 2020 -جىلدىڭ 30-قىركۇيەگىنە دەيىن اياقتاعان پايدالانۋشىلارعا عانا بەرىلەدى»، - دەدى بايان قوڭىربايەۆ.
Coursera - بۇل الەمنىڭ ۇزدىك ۋنيۆەرسيتەتتەرىنىڭ ونلاين كۋرستارىن ۇسىناتىن ونلاين ءبىلىم بەرۋ پلاتفورماسى. قازىرگى ۋاقىتتا ونىڭ 48 ەلدە 200 دەن استام سەرىكتەسى بار. بۇل سەرىكتەستەر - ستەنفورد، پەنسيلۆانيا، پرينستون، ميچيگان، بەيجىڭ ۋنيۆەرسيتەتتەرى. سونىمەن قاتار Coursera IBM، Google جانە PwC سياقتى كومپانيالارمەن سەرىكتەستىك ورناتتى.
بۇل كومپانيالار دا Coursera بويىنشا كۋرستار جۇرگىزىپ جاتىر. Coursera قالاي جۇمىس ىستەيدى؟ كۋرسقا تاپسىرمالار، اپتا سايىنعى تەستتەر جانە قورىتىندى ەمتيحان كىرەدى جانە كۋرس سوڭىندا سەرتيفيكات بەرىلەدى. ءار كۋرس ۇزاقتىعى - تاڭداعان باعدارلاماعا بايلانىستى 6-10 اپتا ارالىعىن قامتيدى. ونلاين- پلاتفورمادا بارلىق ماتەريالدار ءبىر جەردە بولادى.
ويتكەنى جۇيەگە سوزدىك، جاتتىعۋ جيىنتىقتارى بىرىكتىرىلگەن. مۇنىڭ ءبارى قاجەتتى باعدارلامانى وڭاي ىزدەپ، تابۋعا كومەتەسەدى. كۋرستار جاڭادان باستاۋشىلارعا دا، ءبىلىم دەڭگەيلەرىن جەتىلدىرگىسى كەلەتىندەرگە دە ارنالادى. قالاي ءوتىنىش بەرۋگە بولادى؟ الەمدەگى ەڭ جاقسى ءبىلىم بەرەتىن سايتتاردىڭ كۋرستارىنا قاتىسۋ ءۇشىن، اتى-ءجونى، قىزمەت ءتۇرى جانە ەلەكتروندى پوشتاسى كورسەتىلگەن ءوتىنىشتى almaty.coursera@mail.kz ەلەكتروندى مەكەنجايىنا جىبەرۋ كەرەك.
سودان كەيىن ەلەكتروندى پوشتاعا شاقىرۋ جىبەرىلەدى. تىركەلگەننەن كەيىن سايتتا ۇسىنىلعان كەز-كەلگەن كۋرستى، مىسالى IT، قولدانبالى جانە گۋمانيتارلىق عىلىمدار، ەكونوميكا، مەديتسينا، مەنەدجمەنت جانە ماركەتينگ جانە ت. ب. كۋرستارىن تاڭداي الادى. ءوتىنىم بەرگەننەن كەيىن 5 كۇن ىشىندە جاۋاپ كەلەدى. ەگەر جەكە كابينەت ەكى اپتادان ارتىق قولدانىلماسا، بىردەن جويىلادى.
اۆتور: گۇلميرا عوسمانالي
