ءدارى-دارمەك پەن ماسكانى قىمبات باعاعا ساتقاندار ۇستالدى

تۇركىستان. قازاقپارات - تۇركىستان وبلىسىنىڭ اۋماعىندا ءدارى-دارمەكتەر مەن مەديتسينالىق قۇرالداردى جوعارى باعامەن زاڭسىز ساتۋ فاكتىلەرىن انىقتاۋ ماقساتىندا پروفيلاكتيكالىق جانە رەيدتىك ءىس- شارالار جۇرگىزىلۋدە، دەپ حابارلايدى قازاقپارات ءتىلشىسى.

جەرگىلىكتى پوليتسيا قىزمەتى باسقا دا مۇددەلى ورگاندارمەن بىرلەسە وتىرىپ، كارانتين كەزىندە ۆيرۋستىق اۋرۋلاردان ناۋقاستاردى ەمدەۋگە ارنالعان ءدارى- دارمەكتەردى جوعارى باعامەن ساتقان ءدارىحانالار مەن ازاماتتاردى تەكسەرۋدە. كارانتين باستالعاننان بەرى موبيلدىك توپ پوليتسيامەن بىرگە ءدارى- دارمەكتەردى زاڭسىز ساتۋدىڭ 51 فاكتىسىن انىقتاپ، 5232 ءتۇرلى مەديتسينالىق ءدارى- دارمەكتەردى تاركىلەدى.

رەيد بارىسىندا ارىس ا پ ب ج پ ق ۋچاسكەلىك ينسپەكتورلارى اۋىلداردىڭ بىرىنەن ءتيىستى قۇجاتتارسىز تىركەلمەگەن ءدارى- دارمەكتەردى زاڭسىز ساتقان ءدارىحانانى انىقتادى. پوليتسەيلەر ءدارىحانا يەسىنەن «ەۋفيللين»، «انالگين»، «ديمەدرول» جانە «وفيوكسيسين» پرەپاراتتارىن ياعني بارلىعى 77 قاپتامانى تاركىلەپ الدى.

اتالعان جايت بويىنشا ماتەريالدار ق ر دەنساۋلىق ساقتاۋ مينيسترلىگىنىڭ تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنە زاڭدى شەشىم قابىلداۋ ءۇشىن جىبەرىلدى. وسىنداي زاڭبۇزۋشىلىق جايتى بايدىبەك اۋدانىنان دا انىقتالعان.

شايان اۋىلىنداعى ءدارىحانا ساتۋشىسى ساتىپ الۋشىعا «اتسەتيلسولين قىشقىلىنىڭ» 2 وراماسىن، «پاراتسەتامولدىڭ» 3 وراماسىن جانە 2 مەديتسينالىق ماسكانى %30 - عا قىمبات ساتقان. ساتۋشىدان پوليتسيا قىزمەتكەرلەرى 12 وراما «پاراتسەتامول»، «اتسەتيلسولين قىشقىلى» جانە مەديتسينالىق بەتپەردەلەر تاركىلەپ العان. اۋداندا سونداي-اق، كارانتيندىك شەكتەۋ شارالارىنا قاراماستان جۇمىس ىستەگەن 20 دان استام دۇكەن جانە ءدارىحانا يەلەرىنە اكىمشىلىك حاتتامالار تولتىرىلعان.