مارات ءباشىموۆ كارانتين شارالارىن ەكى اپتاعا ۇزارتۋدىڭ ماڭىزىن ايتتى
نۇر- سۇلتان. قازاقپارات - ۇلتتىق قوعامدىق سەنىم كەڭەسىنىڭ مۇشەسى، ەۋروپالىق قۇقىق جانە ادام قۇقىقتارى ينستيتۋتىنىڭ ديرەكتورى مارات ءباشىموۆ پرەزيدەنت كارانتين شارالارىن ەكى اپتاعا ۇزارتۋ تاپسىرماسىنا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.
«مامىر ايىندا شەكتەۋ شارالارىن جەڭىلدەتتىك تە ەلدە ىندەت قايتا ءورشىپ كەتتى. شىلدە ايىنىڭ باسىندا ەنگىزىلگەن كارانتين شارالارى تامىزدىڭ باسىنا دەيىن ۇزارتىلدى. ءبىزدىڭ ەل سەكىلدى باسقا مەملەكەتتەر دە امالسىز كارانتين مەرزىمىن ۇزارتىپ جاتىر. ويتكەنى ول ەلدەردە دە، ءبىزدىڭ مەملەكەتتە دە پوزيتيۆ بار دەسەك تە ىندەتتىڭ بەتى ءالى قايتا قويعان جوق. مەملەكەتتىك ورگاندار دا ايىلىن جيىپ، حالىق تا نازارىن بۇل ماسەلەگە كوبىرەك بۇرا باستادى. پرەزيدەنتتىڭ بۇعان دەيىن ۇكىمەتكە جاساعان ەسكەرتۋىن بىلەسىزدەر. ايتسە دە ءبىزدىڭ ەلدە ىندەتتى ەڭسەردىك دەپ ايتا المايمىز. سەبەبى كۇنىنە 1500-گە تارتا ادامنان كوروناۆيرۋس انىقتالۋدا»، - دەدى مارات ءباشىموۆ قازاقپارات تىلشىسىنە تەلەفون ارقىلى ايتقان پىكىرىندە.
ونىڭ ايتۋىنشا، پرەزيدەنتتىڭ كارانتين شارالارىن ەكى اپتاعا ۇزارتۋى - وتە ماڭىزدى ءارى كەرەكتى شەشىم.
«ويتكەنى قازىر جاعدايدى باقىلاۋدان جىبەرىپ الساق، ۆيرۋس قايتا ءورشىپ كەتۋى مۇمكىن. حالىققا كىنا ارتىپ جاتقانداردىڭ پىكىرىمەن كەلىسە قويمايمىن. ايتسە دە ۆيرۋسقا ءالى دە سەنبەي جۇرگەندەر بار. وكىنىشتىسى، كوشەدە ماسكاسىز، الەۋمەتتىك قاشىقتىقتى ساقتاماي جۇرگەندەردى ءالى كورىپ ءجۇرمىز. سوندىقتان كارانتين شارالارىن مەنىڭشە قاتاڭ ساقتاۋدى ەكى اپتاعا تاعى ۇزارتۋ كەرەك. بۇل دۇرىس شەشىم»، - دەپ قايتالادى ءسوزىن ول.
ەسكە سالا كەتسەك، بۇگىن مەملەكەت باسشىسى قاسىم- جومارت توقايەۆ ەپيدەميولوگيالىق احۋالدى تۇراقتاندىرۋ جونىندە كەڭەس وتكىزىپ، كارانتين شارالارىن ەكى اپتاعا ۇزارتۋدى تاپسىرعان بولاتىن.
