ءۇش جىل جابىق تۇرعان قوجا احمەت ياساۋي كەسەنەسىنىڭ كۇمبەزى قايتا جاڭارتىلدى

تۇركىستان. قازاقپارات - تۇركىستاندا ءۇش جىلدان استام جابىق تۇرعان قوجا احمەت ياساۋي كەسەنەسىنىڭ كۇمبەزى قايتا جاڭارتىلدى.

كۇمبەزدىڭ تاريحي كەلبەتى ساقتالىپ، جەلدەتكىش قاباتتارى رەتكە كەلتىرىلدى، دەپ حابارلايدى قازاقپارات ءتىلشىسى.

قازىر كۇمبەز ەتەگىندەگى سەگىز قىرمەن قوسىلعان جەرىندە گيدرووقشاۋلاۋ جۇمىستارى اياقتالۋعا جاقىن.

جالپى «ازىرەت سۇلتان» مەملەكەتتىك تاريحي-مادەني قورىق-مۋزەيى اۋماعىندا سوڭعى كەزدە تاريحي ورىنداردا قايتا قالپىنا كەلتىرۋ جۇمىستارى جۇرگىزىلىپ، ورتاعاسىرلىق كۇلتوبە قالاشىعى مەن حان ورداسى، ەسكى مەشىت ورنالاسقان ماگيسترالدى كوشە بويىندا ارحەولوگيالىق قازبا جۇمىستارى قولعا الىنعان.

ال، كۇلتوبە قالاشىعىنداعى قازبا جۇمىستارىنىڭ ناتيجەسى بويىنشا 2019-جىلى 5000 نان اسا ءبىزدىڭ ەرامىزعا دەيىنگى 1 عاسىردا جاسالعان ەجەلگى التىن بۇيىمدار تابىلعان. بۇدان بولەك، قوجا احمەت ياساۋي كەسەنەسىنىڭ الدىندا تۋريستەر دەمالاتىن، قالىڭ باۋ-باقشالى سەلفي ايماق جاساقتالماق.

تاريحي نىساننىڭ «تاقيا قاقپاسى» ماڭىندا قازبا جۇمىستارى جۇرگىزىلىپ، تابىلعان جادىگەرلەر تۋريستەر كوز قۋانىشىنا اينالماق. قالادا سونداي-اق، ب. ساتتارحانوۆ داڭعىلى اۋماعىندا ەتنواۋىل سالىنۋدا.

ايتا كەتەيىك، قوجا احمەت ياساۋي كەسەنەسىندە اتقارىلعان جۇمىستاردىڭ بارلىعى يۋنەسكومەن كەلىسە وتىرىپ جۇرگىزىلۋدە.

كەسەنەدەگى قايتا قالپىنا كەلتىرۋ جۇمىستارىمەن قازاقستان رەسپۋبليكاسى مادەنيەت جانە سپورت مينيسترلىگىنىڭ وكىلدەرى تانىسقان بولاتىن.