ءادىلحان ەرجانوۆتىڭ فيلمى ۆەنەتسيا كينوفەستيۆالىنە قاتىسادى
الەمنىڭ ەڭ ءىرى جانە بەدەلدى فەستيۆالدەرىنىڭ ءبىرى بيىل 2-12- قىركۇيەك ارالىعىندا جاندى فورماتتا وتەدى.
«كوكجيەكتەر» باعدارلاماسىنىڭ حالىقارالىق قازىلار القاسىن اتاقتى فرانسۋز كينوگەرى كلەر دەني («جاقسى جۇمىس»، «ىشتەگى جايدارلى شۋاق»، «اقسۇيەكتەر قوعامى») باسقارادى. «سارى مىسىق» («جەلتايا كوشكا») كينوتۋىندىسىن Short Brothers (قازاقستان) كومپانياسى، ش. ايمانوۆ اتىنداعى «قازاق فيلم» ا ق (قازاقستان) جانە Arizona Productions (فرانسيا) كينوستۋدياسىنىڭ قاتىسۋىمەن ZERDE FILMS (قازاقستان) كومپانياسى تۇسىرگەن.
«سارى مىسىق» - رەجيسسەر ءادىلحان ەرجانوۆتىڭ توعىزىنشى تولىق مەتراجدى كوركەم فيلمى. ءتۇسىرىلىم جۇمىسى بىلتىر الماتى وبلىسىندا ءوتتى. فيلمنىڭ باس پروديۋسەرلەرى: اسەل ءسادۋاقاسوۆا، قانات بيتەمىروۆ جانە ەربول تويبايەۆ.
«مەن ءۇشىن كەرمەك كەيىپكەرلەرىمىزدىڭ ىشىندەگى ەڭ مەيىرىمدىسى، ونىڭ قازىرگىدەي كۇردەلى ۋاقىتتا پايدا بولۋىندا دا ءبىر ءمان بار. ارينە، «كوكجيەكتەر» باعدارلاماسىنا قاتىساتىنىمىزعا قۋانىشتىمىن. مەنىڭ ويىمشا، ۆەنەتسيا كينوفەستيۆالىنىڭ بۇرىڭعى فورماتتا ءوتۋىنىڭ ءوزى، تۇساۋكەسەرى بولاتىن كەز كەلگەن فيلم ءۇشىن ۇلكەن ساتتىلىك. وسىنداي مۇمكىندىك ءۇشىن فەستيۆال ىرىكتەۋشىلەرىنە جانە شىعارماشىلىق ۇجىمعا العىس ايتامىن»، - دەدى ءادىلحان ەرجانوۆ.
فيلم قازاقستاندىق «بونني مەن كلايدتىڭ» وقيعاسىن باياندايدى. تۇرمەدەن شىعىپ، ەلگە ورالعان كەرمەك ەسىمدى جاس جىگىت، ءوزىنىڭ تۋىپ-وسكەن قالاسىندا بەلگىلى ءبىر قىلمىستىق توپتىڭ ءوز زاڭدارىن ورناتقانىن كورەدى.
ەۆا اتتى سۇيىكتىسى دە وسى ادامداردىڭ قىسىم كورسەتۋىمەن تەرىس جولعا ءتۇسىپ كەتكەن، كەرمەك تە قىلمىسقا بەلشەسىنەن باتۋعا ءماجبۇر بولادى. دەگەنمەن ول سۇيگەن قىزبەن بىرگە ەركىندىككە قول جەتكىزىپ، كينوتەاتر سالۋ تۋرالى ارمانىن ىسكە اسىرماق بولادى...
كەرمەكتى رەسەيلىك اكتەر ازامات نىعمانوۆ وينايدى. كورەرمەندەر ونى الەكسەي ميزگيريەۆتىڭ «كونۆوي»، اندرەي شالوپانىڭ «28 پانفيلوۆشىلار» كارتيناسى ارقىلى بىلەدى. ەۆانىڭ ءرولىن ناريمان تورەبايەۆتىڭ «گرياز بولشوگو گورودا»، الىشەر سۇلەيمەنوۆتىڭ «شاتىر ۇستىندەگى بۇلت» كارتينالارىنا تۇسكەن قازاقستاندىق جاس اكتريسا كاميلا نۇعمانوۆا سومدايدى.
ەكى اكتەر دە ەرجانوۆتىڭ كارتيناسىنا العاش رەت ءتۇسىپ وتىر. جامباس ەسىمدى قىلمىسكەردىڭ ءرولىن وسىعان دەيىن رەجيسسەردىڭ «اتبايدىڭ شايقاسى» جانە «ۇلبولسىن» فيلمدەرىنە تۇسكەن اكتەر سانجار ءمادي وينايدى. سونىمەن قاتار، فيلمگە ەركىن عۇباشيەۆ جانە ەرجان جامانقۇلوۆ تۇسكەن، ولار ەرجانوۆتىڭ باسقا دا كارتينالارىنا قاتىسقان بولاتىن.
فيلمنىڭ سەناري اۆتورلارى ءادىلحان ەرجانوۆ پەن يننا سمايلوۆا. پروديۋسەرلىك مىندەتتى رەجيسسەردىڭ تۇراقتى ارىپتەستەرى سەرىك ابىشيەۆ پەن ولگا حلاشيەۆا اتقاردى. كارتينانىڭ كو- پروديۋسەرى فرانسۋز مامانى گيوم دە سيەل. فيلمنىڭ وپەراتورى وسىعان دەيىن ءادىلحان ەرجانوۆتىڭ «ۇكىلى كامشات» جانە «اتبايدىڭ شايقاسى» فيلمدەرىن تاسپالاعان - ەركىنبەك پىتىراليەۆ. قويۋشى- سۋرەتشى - ەرمەك وتەگەنوۆ، مۋزىكاسىن جازعان قازاقستاندىق تانىمال كومپوزيتور اليم زايروۆ.
