تۇركىستاندا بيىل الەمدە تەڭدەسى جوق تۋريستىك كەشەن اشىلادى

تۇركىستان. قازاقپارات - ءومىرزاق شوكەيەۆ وبلىس ورتالىعىندا ءجۇرىپ جاتقان اكىمشىلىك، الەۋمەتتىك نىسانداردىڭ قۇرىلىس قارقىنىن باقىلادى، دەپ حابارلايدى قازاقپارات ءوڭىر باسشىسىنىڭ باسپا ءسوز قىزمەتىنە سىلتەمە جاساپ.

وبلىس اكىمى تۇركىستان قالاسىنداعى باسقارمالار عيماراتى مەن دراما تەاترىنىڭ، قوجا احمەت ياساۋي مۋزەيىنىڭ، ۇلى جىبەك جولى قولونەرشىلەر ۇلتتىق ورتالىعى عيماراتتارىنىڭ قۇرىلىس الاڭدارىندا بولدى.

قۇرىلىس جۇمىستارى اياقتالىپ قالعان نىسانداردا ىشكى ارلەۋ، تەحنيكا مەن جيھاز ورناتۋ جانە سىرتقى اباتتاندىرۋ جۇمىستارى جۇرگىزىلۋدە. مەملەكەتتىك- جەكەشەلىك ارىپتەستىك اياسىندا «Sembol construction» تۇرىك كومپانياسى قولعا العان «كەرۋەن- ساراي» كوپبەيىندى تۋريستىك كەشەن قۇرىلىسى قارقىندى ءجۇرىپ جاتىر. قۇنى 39 ميلليارد تەڭگە تۇراتىن الەمدە تەڭدەسى جوق تۋريستىك كەشەندە زاماناۋي قوناق ۇيلەر، شىعىس بازارى، مەيرامحانالار ىسكە قوسىلىپ، جاساندى كول پايدا بولادى. بىرەگەي جوبادا كونە شاھاردىڭ كورىنىسى ساقتالعان. قۇرىلىس جۇمىستارى بيىل اياقتالادى دەپ كۇتىلۋدە.