الاكول مەن بۋرابايعا باراتىن وتباسىنىڭ كەم دەگەندە ءبىر مۇشەسى پ ت ر-تەستتەن ءوتۋى كەرەك
نۇر-سۇلتان. قازاقپارات - الاكول مەن بۋرابايعا دەمالۋعا باراتىن وتباسىنىڭ كەم دەگەندە ءبىر مۇشەسىندە پ ت ر-تەست انىقتاماسى بولۋى كەرەك.
بۇل تالاپ تۋرالى م س م تۋريزم يندۋسترياسى كوميتەتىنىڭ ءتوراعاسى داستان رىسپەكوۆ ايتتى، دەپ حابارلايدى قازاقپارات ءتىلشىسى.
«ەلدەگى ەپيدەميولوگيالىق جاعدايدىڭ ناشارلاۋىنا بايلانىستى كوروناۆيرۋس ينفەكسياسىنىڭ تارالۋىن شەكتەۋ جانە ازاماتتاردىڭ قاۋىپسىزدىگىن قامتاماسىز ەتۋ ماقساتىندا اۋماقتاردا كارانتيندىك شارالار قايتادان ەنگىزىلگەنىن بىلەسىزدەر. وسىنى ەسكەرە وتىرىپ، كەيبىر وڭىرلەردەگى دەمالىس ورىندارىندا جانە كۋرورتتىق ايماقتاردا، اتاپ ايتقاندا شىعىس قازاقستانداعى الاكول جاعالاۋىندا جانە شۋچە، بۋراباي كۋرورتتىق ايماعىندا دەمالۋشىلاردى قابىلداۋدى توقتاتۋ تۋرالى سانيتارلىق دارىگەردىڭ قاۋلىلارى قابىلدانعان بولاتىن. كۋرورتتىق ايماقتارداعى ورنالاستىرۋ ورىندارىنىڭ ۇزدىكسىز جۇمىس ىستەۋىن قامتاماسىز ەتۋ جانە تولەنگەن بروندار بويىنشا اقشالاي قاراجاتىنىڭ قايتارىلۋىن بولدىرماۋ ماقساتىندا مادەنيەت جانە سپورت مينيسترلىگى وڭىرلەردىڭ اكىمدىكتەرىمەن بىرلەسىپ، قابىلدانعان سانيتارلىق دارىگەرلەردىڭ قاۋلىلارىنا كەيبىر تولىقتىرۋلار ەنگىزۋ مۇمكىندىگى تالقىلاندى»، - دەدى داستان رىسپەكوۆ و ك ق-دا وتكەن باسپا ءسوز ءماسليحاتىندا.
ونىڭ ايتۋىنشا، وسى جۇمىستىڭ ناتيجەسىندە الماتى وبلىسىنداعى الاكول كولىنىڭ جاعالاۋىندا، سونداي-اق شۋچە، بۋراباي كۋرورتتىق ايماعىندا ورنالاسقان كۋرورتتىق ايماقتار بويىنشا ورتاق شەشىم جاسالعان.
«اتاپ ايتقاندا، تاۋارلار مەن قىزمەتتەردىڭ ساپاسى مەن قاۋىپسىزدىگىن قىزمەتىمەن بەرىلگەن ءتيىستى دايىندىق اكتىلەرى بار ورنالاستىرۋ ورىندارىندا الدىن الا تولەنگەن بروندار بويىنشا دەمالۋشىلاردى قابىلداۋعا رۇقسات ەتىلدى. ش ق و- داعى الاكول كولىنىڭ جاعالاۋىندا وتباسىنىڭ ءبىر مۇشەسىندە پ ت ر- انىقتاماسى بولسا بۇرىن كوزدەلگەن تالاپتاردى ەسكەرە وتىرىپ، دەمالۋىنا بولادى. بلوك- پوستتارداعى وتكىزۋ جۇيەسى تۋريستەردە ورنالاستىرۋ ورىندارى ۇسىنعان بروننىڭ بار- جوعى تۋرالى دەرەكتەرمەن سالىستىرىلادى»، - دەدى ول.
