16:16, 28 - شىلدە 2020 | GMT +5
ەلوردادا «قولىمداعى كىتاپ» اكسياسى باستالدى
نۇر-سۇلتان. قازاقپارات - نۇر-سۇلتان قالاسى بويىنشا «رۋحاني جاڭعىرۋ» جوبالىق كەڭسەسى باستاعان اكسياعا Nur Otan پارتياسى، ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ وقىتۋشىلارى مەن بلوگەرلەر قولداۋ كورسەتۋدە، دەپ حابارلايدى قازاقپارات ەلوردا اكىمدىگىنىڭ رەسمي سايتىنا سىلتەمە جاساپ.
«رۋحاني جاڭعىرۋ» جوبالىق كەڭسەسى كارانتين ۋاقىتىندا «قولىمداعى كىتاپ» اكسياسىن باستادى. الەۋمەتتىك جەلى قولدانۋشىلارى اراسىندا كىتاپ وقۋ مادەنيەتى ناسيحاتتالاتىن بولادى. قاتىسۋشىلار كارانتين ۋاقىتىندا وزدەرى وقىپ جاتقان كىتاپتى تانىستىرادى.
سونداي-اق وزدەرىنىڭ سۇيىكتى اۆتورلارىمەن، شىعارمالارىمەن بولىسەدى. اكسيا بارىسىندا كىتاپقۇمار بلوگەر جانە قوعام قايراتكەرلەرىمەن تىكەلەي ەفيرلەر، ونلاين سۇحباتتار ۇيىمداستىرىلادى. ونلاين ءىس-شارانىڭ تۇساۋكەسەرى بلوگەر اينۇر بۇلاقبايمەن وتكىزىلدى. تىكەلەي ەفير بارىسىندا ول كىتاپ وقۋدى قالاي ادەتكە اينالدىرۋ، جىلدام وقۋ تەحنيكاسىنىڭ قۇپيالارىمەن ءبولىستى.
ەفير بارىسىندا كورەرمەندەر ءوز سۇراقتارىنا جاۋاپ الدى.
