شيكىزات قورىنا ءۇمىت ارتپاي، ءوزىمىز ءونىم ءوندىرۋىمىز قاجەت - دەپۋتات
«كوروناۆيرۋس ىندەتى بۇكىل الەمدى وزىنە قاراتقان تاريحي وقيعا بولىپ تۇر. ول ادام شىعىنى مەن قاتار ەكونوميكاعا ءوز زاردابىن تيگىزۋدە. پاندەميا كەزىندە كوپتەگەن ەلدەردىڭ ەكونوميكالىق پروبلەمالارى ايقىندالا باستادى، ونىڭ ىشىندە ءبىزدىڭ ەلدە بار. ياعني، كارانتين مەن توتەنشە جاعداي ەلدەگى پروبلەمالاردى كورسەتىپ بەردى. پاندەميا ەل ەكونوميكاسىنا كەرى اسەرىن تيگىزدى. ارينە ول پروبلەمالار پاندەميانىڭ كەزىندە عانا پايدا بولعان جوق، بۇرىننان بار تەك پاندەميا كەزىندە ول ۇدەي ءتۇستى. ال ءبىزدىڭ ەكونوميكامىزدىڭ العاشقى پروبلەماسى ونىڭ شيكىزات جانە مۇناي رەسۋرستارىنا تاۋەلدىلىگى. ءبىز ۇنەمى شيكىزات قورىنا ءۇمىت ارتىپ وتىرماۋىمىز كەرەك، ونىمدەردى ءوزىمىز ءوندىرۋىمىز قاجەت. ەلدى قاراپايىم زاتپەن قامتاماسىز ەتۋ ءۇشىن ونى شەتەلدەن ساتىپ الامىز. ءبىز ەندىگى ۋاقىتتا ءوزىمىز ءوندىرۋىمىز قاجەت، سەبەبى پاندەميا كەزىندە شەكارالار جابىلىپ قاجەتتى دۇنيە تاپشىلىعىن كوردىك»، - دەدى نۇرجان التايەۆ ق ر سىبايلاس جەمقورلىققا قارسى قىزمەتى اگەنتتىگىندە وتكەن ونلاين كونفەرەنسيا بارىسىندا.
حالىق قالاۋلىسىنىڭ پىكىرىنشە، الدىمەن ۇلتتىق ەكونوميكانىڭ قاۋىپسىزدىگىن قامتاماسىز ەتۋىمىز قاجەت.
«ءبىز ءوندىرىس قاۋىپسىزدىگىن قامتاماسىز ەتە وتىرىپ، الدىمەن ەلگە قاجەتتى دەگەن ونىمدەردى شىعارۋىمىز ءتيىس. پاندەميا كەزىندەگى ەكىنشى ماسەلە ول جەمقورلىق پەن اشكوزدىك. توتەنشە جاعداي كەزىندە بىرىگىپ ەل بولۋدىڭ ورنىنا كەيبىر مونوپوليالىق ۇيىمدار باعانى كوتەرىپ، قولدان تاپشىلىق جاسادى. بۇنىڭ ارتىندا سىبايلاس جەمقورلىق تۇر. جانە بۇل سۇراق ەكونوميكاعا تىكەلەي قاتىستى»، - دەدى ول.
