دەنساۋلىق مينيسترلىگى ۇكىمەتكە كارانتيندى جۇمسارتۋ جوسپارىن ۇسىندى

نۇر-سۇلتان. قازاقپارات - ق ر پرەمەر-ءمينيسترى اسقار مامين ەلدەگى ەپيدەميولوگيالىق جاعداي مەن كوروناۆيرۋس ينفەكتسياسىنا قارسى كۇرەس شارالارى تۋرالى ۇكىمەت وتىرىسىن وتكىزدى، دەپ حابارلايدى قازاقپارات.

«كارانتيندىك شارالاردىڭ مەرزىمى 2- تامىزدا اياقتالادى. جالپى، وسى كەزەڭدە ەپيدەميولوگيالىق جاعداي تۇراقتاندى، مەديتسينا ۇيىمدارىنىڭ جۇكتەمەسى ءبىرشاما ازايدى. جازىلىپ كەتكەندەردىڭ سانى 63 پايىزدان استى. ۆيرۋس جۇقتىرۋدىڭ تاۋلىكتىك ءوسىمى 4 پايىزدان 1,7 پايىزعا دەيىن ازايدى»، - دەدى پرەمەر-مينيستر ۇكىمەتتىڭ بۇگىنگى وتىرىسىندا.

اۋرۋحانالارداعى توسەك-ورىن جۇكتەمەسى 46 پايىزعا دەيىن تومەندەدى. اي قورىتىندىسى بويىنشا جەدەل جاردەمدى شاقىرۋ كورسەتكىشى 38 پايىزعا تۇسكەن.

«بارلىق وڭىرلەر ءدارى- دارمەكتىڭ جەتكىلىكتى قورىمەن قامتاماسىز ەتىلگەن. وسىعان وراي، ەپيدەميولوگيالىق جاعدايدى ودان ءارى جاقسارتۋىمىز قاجەت. بۇگىن دەنساۋلىق ساقتاۋ مينيسترلىگى كارانتيندىك شارالاردى بىرتىندەپ الۋ جوسپارىن ۇسىنىپ وتىر. قازىرگى جاعداي مەن وسى ايدىڭ قورىتىندىسىن ەسكەرە وتىرىپ، مەملەكەتتىك كوميسسيانىڭ وتىرىسىندا بۇل جوسپار قاراستىرىلىپ، ءتيىستى شەشىم قابىلدانادى»، - دەدى اسقار مامين.