الماتىدا زاڭسىز ءدارى-دارمەك دايىنداعان استىرتىن سەحتى ۇيىمداستىرۋشىلار قامالدى

الماتى. قازاقپارات - الماتىدا ءدارى-دارمەك دايىندايتىن استىرتىن سەح ۇيىمداستىرعان كۇدىكتىلەر ۇستالدى، دەپ حابارلايدى قارجى مونيتورينگى كوميتەتى باسپا ءسوز قىزمەتىنە سىلتەمە جاساپ.

تاياۋدا كوميتەتتىڭ الماتى قالاسى بويىنشا ەكونوميكالىق تەرگەۋ دەپارتامەنتى قىزمەتكەرلەرىنىڭ 100 توننا كولەمىندە دايىن ءونىم ساقتالعان جالعان ءدارى-دارمەك جاسايتىن ۇلكەن استىرتىن سەحتى انىقتاعان بولاتىن.

«وسى ءىس بويىنشا استىرتىن سەحتى ۇيىمداستىرۋشى، ونىڭ كومەكشىسى جانە دەلدال انىقتالىپ، ۇستالدى. 26- شىلدەدە الماتى قالاسى مامانداندىرىلعان اۋدانارالىق تەرگەۋ سوتىنىڭ تەرگەۋ سۋدياسى ولارعا قاتىستى 2 اي مەرزىمگە قاماۋعا الۋ تۇرىندەگى شارانى سانكسيالادى»، دەلىنگەن حابارلامادا.

قىلمىستىق كودەكستىڭ 222-بابىنىڭ 1- ءبولىمى (تاۋار بەلگىسىن زاڭسىز پايدالانۋ)، 323-بابىنىڭ 2- ءبولىمى 1, 3 تارماعى (جالعان دارىلىك زاتتارمەن نەمەسە مەديتسينالىق بۇيىمدارمەن جۇمىس ىستەۋ) جانە 262-بابىنىڭ 1- ءبولىمى 2-تارماعى (ۇيىمداسقان توپ، قىلمىستىق ۇيىم قۇرۋ جانە ولارعا باسشىلىق ەتۋ، سول سياقتى ولارعا قاتىسۋ) بويىنشا قىلمىستىق ءىس تىركەلدى.