قۇربان ايت كۇنى مال بازارى جۇمىس ىستەمەيدى
اقتوبە وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنىڭ باسشىسى نۇرسۇلۋ بەركىمبايەۆا قۇربان ايت مەرەكەسى قارساڭىندا جاڭا قاۋلى شىعاردى.
قاۋلىعا سايكەس كوپشىلىك، مەرەكەلىك جانە وتباسىلىق ءىس-شارالاردى، ونىڭ ىشىندە ءۇي ىشىندە ادامدار كوپ جينالاتىن باسقوسۋدى وتكىزۋگە تىيىم سالىندى. سونىمەن بىرگە 31- شىلدە مەن 2- تامىز ارالىعىندا مال بازارى جۇمىس ىستەمەيدى.
«مال سويۋ ورىندارىن انىقتاۋ جانە قۇربان شالۋ راسىمدەرى ونلاين فورماتتا ۇيىمداستىرىلادى. مال سويۋدى تەك تاپسىرىس جانە جەتكىزۋ ارقىلى ۆەتەرينارلىق سەرتيفيكات بولعان جاعدايدا، كەلۋشىلەرسىز جۇرگىزىلەدى. مال سويۋ سەحتارىنىڭ بارلىق پەرسونالىن تەرمومەتريا جۇرگىزۋ ءۇشىن مەديتسينا قىزمەتكەرىن تارتۋدى جانە ناتيجەلەرىن جۋرنالعا ەنگىزۋدى تاپسىرامىن. جەدەل رەسپيراتورلىق ۆيرۋستىق ينفەكتسيا (جوعارى تەمپەراتۋرا، جوتەل، تۇماۋ) جانە باسقا دا جۇقپالى اۋرۋ بەلگىلەرى بار قىزمەتكەرلەردى جۇمىسقا جىبەرمەۋ قاجەت»، - دەپ جازىلعان قاۋلىدا.
مال سويۋ سەحتارىندا دەزينفەكتسيالىق جۇمىس كۇشەيەدى. ۆەتەرينارلىق باقىلاۋ جانە قاداعالاۋ كوميتەتىنىڭ وبلىستىق اۋماقتىق ينسپەكتسياسى، مال سويۋمەن اينالىساتىن كاسىپكەرلىك سۋبەكتىلەرىنىڭ باسشىلارى تالاپتاردىڭ ورىندالۋىنا جاۋاپتى. سونىمەن بىرگە وبلىستىق پوليتسيا دەپارتامەنتى بوگدە ادامنىڭ سەح ىشىنە كىرمەۋىن باقىلايدى.
