قازاقستاندا قاراقۇيرىقتاردى ساقتاپ قالۋعا باعىتتالعان تىڭ جوبا ىسكە قوسىلدى

نۇر- سۇلتان. قازاقپارات - حالىقارالىق تابيعاتتى قورعاۋ وداعى قازاقستانداعى قاراقۇيرىقتى ساقتاپ قالۋ بويىنشا قازاقستاننىڭ بيوالۋاندىلىعىن ساقتاۋ قاۋىمداستىعىنىڭ ۇسىنىسىنا قولداۋ ءبىلدىردى، دەپ حابارلايدى قازاقپارات ءتىلشىسى.

بۇل جاڭالىقتى Facebook پاراقشاسىندا ق ر ەكولوگيا، گەولوگيا جانە تابيعي رەسۋرستار مينيسترلىگىنىڭ ورمان شارۋاشىلىعى كوميتەتىنىڭ باسپا ءسوز حاتشىسى ساكەن دىلداحمەت ءبولىستى. ونىڭ حابارلاۋىنشا، كەيىنگى ون جىلدا قازاق دالاسىندا قاراقۇيرىقتىڭ سانى 90 پايىزعا ازايىپ كەتكەن. مۇنداعى باستى سەبەپ - براكونەرلىك پەن قاراقۇيرىقتار ءۇشىن تۇرعىلىقتى مەكەننىڭ تارىلىپ كەتۋى. جوبا اياسىندا دالالىق زەرتتەۋ جۇمىستارىن جۇرگىزىپ، سپۋتنيكتىك تاراتقىش ارقىلى قاراقۇيرىقتاردى تاڭبالاپ، جەرگىلىكتى حالىقپەن جۇمىس جۇرگىزۋ كوزدەلگەن. سونىمەن قاتار قازاقستان مەن تۇرىكمەنستان شەكاراسىنداعى قورشاۋلاردىڭ قاراقۇيرىقتاردىڭ تىرشىلىگىنە قالاي اسەر ەتەتىنىن انىقتاۋ كوزدەلگەن. زەرتتەۋ جۇمىستارى 2021 -جىلعا دەيىن سوزىلادى.

«جوبا ورتالىق ازيا ايماعى بويىنشا 2019 -جىلى IUCN Save Our Species باعدارلاماسىن جۇزەگە اسىرۋدىڭ ارقاسىندا ىسكە اسىرىلعالى وتىر. جابايى اڭداردىڭ كوشە تىرشىلىك ەتەتىن تۇرلەرىن ساقتاۋ بويىنشا كونۆەنتسيا بونن كونۆەنتسياسى (CMS) رەتىندە تانىمال»،- دەيدى ساكەن دىلداحمەت.

ايتا كەتەرلىگى قاراقۇيرىق - قاراقۇيرىق تۇقىمىنىڭ اشاتۇياقتى ءتۇرى. قازاقستاننىڭ وڭتۇستىك وڭىرلەرىندە مەكەن ەتەدى. قازاقستاننىڭ قىزىل كىتابىنا ەنگىزىلگەن. حالىقارالىق قىزىل تىزىمدە «قاۋىپ تونگەن» مارتەبەسىنە يە. 2015 -جىلعى مالىمەت بويىنشا كەزىندە 200 مىڭ بولعان قاراقۇيرىقتىڭ بۇل كۇندە 13-15 مىڭى عانا قالعان.