قازاقستاندا كۇزدە ازىق- تۇلىك باعاسى قىمباتتاۋى مۇمكىن بە

نۇر- سۇلتان. قازاقپارات - قازاقستاندا كۇزدە ازىق- تۇلىك باعاسى قىمباتتاۋى مۇمكىن بە؟ بۇل سۇراققا ساۋدا جانە ينتەگراتسيا ۆيتسە- ءمينيسترى ازامات اسقار ۇلى جاۋاپ بەردى، دەپ حابارلايدى قازاقپارات ءتىلشىسى.

«بىزدە جالپى الەۋمەتتىك ماڭىزى بار ازىق- تۇلىكتىڭ 19 ءتۇرى بويىنشا ءتۇسىم جامان ەمەس. بۇل ەڭ الدىمەن - كوكونىس پەن جەمىس- جيدەك. فەرمەرلەرگە ەڭ الدىمەن ىشكى نارىقتى تولتىرۋ مەن ەل ىشىندە ارزان باعاعا ساتۋ تۋرالى قارسى مىندەتتەمەلەردى جۇكتەي وتىرىپ، ءبىز ازىق- تۇلىك تاۋارلارىن ارزانداتۋعا قول جەتكىزەمىز. سونىمەن بىرگە اينالمالى سحەما، ساۋدا جەلىلەرىنە قارسى مىندەتتەمەلەردى جۇكتەۋ، لوگيستيكانى وڭتايلاندىرۋ سەكىلدى شارالار ازىق- تۇلىك باعاسىن ارزانداتۋعا ايتارلىقتاي سەپ بولادى»، - دەدى ازامات اسقار ۇلى و ك ق- دا وتكەن باسپا ءسوز ءماسليحاتىندا.

ۆيتسە- ءمينيستردىڭ ايتۋىنشا، جىل باسىنان بەرى ەلدە الەۋمەتتىك ماڭىزى بار ازىق- تۇلىك باعاسى 5,7 پايىزعا قىمباتتاعان.

«ەلىمىزدە الەۋمەتتىك ماڭىزى بار ازىق- تۇلىك باعاسى 9,1 نەمەسە 7 پايىزعا دەيىن قىمباتتاعان كەزدەر بولعان. كارانتين ۋاقىتىندا شەكتى باعالاردى بەكىتۋ ارقىلى ءبىز باعانى ۇستاپ قالدىق. البەتتە بۇل - نارىقتىق شارالار ەمەس. كارانتيننەن كەيىن شەكتى باعالاردى الىپ تاستادىق. الايدا جەرگىلىكتى ورىنداردا ازىق- تۇلىك باعاسىن رەتتەۋ اكىمدىكتەردىڭ قۇزىرەتى ەكەنىن ەسكە سالعىم كەلەدى. ەگەر كۇزدە الەۋمەتتىك ماڭىزى بار تاۋارلاردىڭ باعاسى وسسە - ساۋدا جانە ينتەگراتسيا مينيسترلىگى شەكتى باعالاردى قويۋعا دايىن. ءبىراق ەڭ باستىسى - ازىق- تۇلىكتىڭ قازىرگى كولەمى جەتكىلىكتى. سوندىقتان ءبىز باعانىڭ ءوسۋىن 6-7 پايىزدىق دەڭگەيدە كۇتىپ وتىرمىز»، - دەدى ازامات اسقار ۇلى.