ۇشاقپەن ۆيرۋس تاراتتى دەگەن اقپارات جالعان - پۋلمونولوگ

الماتى. قازاقپارات - الماتى فتيزيوپۋلمونولوگيا ورتالىعىنىڭ جۇقپالى اۋرۋلار ءبولىمىنىڭ مەڭگەرۋشىسى، فتيزيوحيرۋرگ، پۋلمونولوگ ابزال مالباسقانوۆ ەل اراسىندا تاراعان «ۇشاقپەن ۆيرۋس شاشتى» دەگەن اڭگىمەگە قاتىستى تۇسىنىك بەردى، دەپ حابارلايدى قازاقپارات ءتىلشىسى.

ونىڭ ايتۋىنشا، ەل اراسىندا تاراعان «ۇشاقتارمەن ۆيرۋس شاشتى» دەگەن اڭگىمە شىندىققا جاناسپايدى.

«كەيبىر ادامدار جالعان اقپارات تاراتۋعا قۇمار. ۇشاقپەن، تىكۇشاقپەن ۆيرۋس شاشىپ كەتىپتى دەگەن اقپارات الەۋمەتتىك جەلىدە كوپتەپ تاراتىلىپ جاتىر. بۇل ادامنىڭ اقىلىنا دا سىيمايدى. بۇل سۇراققا ەۋروپالىق عالىمدار بىردەن جاۋاپ بەرگەن. جەر بەتىندەگى كوروناۆيرۋس ينفەكسياسىنىڭ بارلىعىن جيناعاننىڭ وزىندە جالپى سالماعى 1 كەلىگە جەتپەيدى. ونى بارلىق وڭىرگە قالاي سەۋىپ شىعۋعا بولادى؟»، - دەدى مالباسقانوۆ.

مامان سونداي-اق، دەزينفەكسيالىق قۇرالدار پنيەۆمونيا تۋدىرادى دەگەن اقپاراتقا تۇسىنىك بەردى. «دەزينفەكسيالىق قۇرالدار پنيەۆمونيا ەمەس، اللەرگيا تۋعىزۋى مۇمكىن»، - دەدى ول.

سونىمەن قاتار، ول پنيەۆمونياعا شالدىققان ادامدارعا مونشاعا نەگە بارۋعا بولمايتىندىعىن ءتۇسىندىردى.

«پنيەۆمونياعا شالدىققان ناۋقاستارعا 2-3 اي مونشادا بۋعا تۇسۋگە بولمايدى. سەبەبى ىستىقتا اتموسفەرالىق قىسىم كوتەرىلىپ، جۇرەك- قان تامىرلارىنا، تىنىس الۋ جۇيەسىنە كەرى ىقپال ەتۋى مۇمكىن»، - دەدى ول.