پۋلمونولوگ مامان كوروناۆيرۋس پەن پنيەۆمونيانى قالاي اجىراتۋ كەرەكتىگىن ايتتى

الماتى. قازاقپارات - الماتىدا وتكەن ونلاين سۇحبات بارىسىندا فتيزيوپۋلمونولوگيا ورتالىعىنىڭ جۇقپالى اۋرۋلار ءبولىمىنىڭ مەڭگەرۋشىسى، فتيزيوحيرۋرگ، پۋلمونولوگ ابزال مالباسقانوۆ كوروناۆيرۋستىق پنيەۆمونيانى باسقا پنيەۆمونيادان قالاي اجىراتۋعا بولاتىندىعىن ءتۇسىندىردى، دەپ حابارلايدى قازاقپارات ءتىلشىسى.

«ادام وكپەسى قابىنىپ جاتقانىن بىلمەۋى دە مۇمكىن. سەبەبى وكپەنىڭ باستى فۋنكسياسى - گاز الماسۋ پروتسەسى. وكپەدە جۇيكە تالشىقتارى بولمايدى. سىرتقى قابىعىندا عانا جۇيكە تالشىقتارى ورنالاسادى. ال قابىنۋ ينتەرستيسيالدى تىندە بولادى. وكپەنىڭ تىرشىلىك كولەمى دەگەن تۇسىنىك بار. ول 3-5 ليتر بولادى. ادەتتە جاي ادام وكپەسىنىڭ 50 پايىز عانا مۇمكىندىگىن قولدانادى. ال سپورتشىلار، انشىلەر 100 پايىز مۇمكىندىگىن پايدالانادى. سوندىقتان، وكپەنىڭ قابىنىپ جاتقانىن كەي ادامدار سەزبەۋى دە مۇمكىن. تەك القىنىپ، تىنىس الۋ مۇمكىندىگى ازايعاندا عانا ادام پنيەۆمونيا ەكەنىن تۇسىنەدى»، - دەدى ول.

دارىگەر مامان كوروناۆيرۋستىق ينفەكسيانىڭ تارالۋىن تەجەۋ ءۇشىن ءبىرقاتار سالت- داستۇرىمىزدەن باس تارتۋعا تۋرا كەپ تۇرعانىن ايتتى.

«قازاقستاندا قازىر ىندەتتى ازايتۋ ءۇشىن ءبىرقاتار قاتاڭ شارالاردى قولعا الۋعا تۋرا كەلىپ تۇر. سالت ءداستۇر، عۇرپىمىزدى قايتا قاراستىرۋعا تۋرا كەلدى. جاقسىسىن الىپ، جامانىن تاستاۋ كەرەك بولدى. الەۋمەتتىك جەلىدە جىلت ەتكەندى ساتىپ الۋعا قاجەتتىلىك جوق. سالاۋاتتى ءومىر سالتىن ۇستانۋ كەرەك. بىزدە ادامدار اس مازىرىنە كوڭىل بولمەيدى. تەز دايىن بولاتىن، مايلى، قۋىرىلعان تاماقتارعا بەيىمبىز. اۋىرۋ كەزىندە سۇيىق تاماقتى كوپ پايدالانىپ، پايداسى زور، ۆيتاميندەر ىشكەن دۇرىس. كوبىرەك جەمىس- جيدەك، كوكونىس جەۋ كەرەك. ءسىز ساقتانساڭىز، جاقىندارىڭىزدى ساقتاساڭىز، ەل بولىپ ىندەتتى جەڭەتىن بولامىز»، - دەدى پۋلمونولوگ مامان.