سولتۇستىك كورەيادا العاش رەت كوروناۆيرۋس جۇقتىرۋى مۇمكىن ناۋقاس انىقتالدى
ينفەكتسيانى 19- شىلدە كۇنى كورەيا رەسپۋبليكاسىنان ورالعان «قاشقىن» الىپ كەلدى دەگەن كۇدىك بار، دەپ حابارلايدى قازاقپارات قىتاي ورتالىق تەلەارناسىنا (CCTV) سىلتەمە جاساپ.
CCTV ارناسىنىڭ مالىمەتىنشە، پاتسيەنتتىڭ تىنىس الۋ جولدارى مەن قان تالداۋىن تەكسەرگەن سوڭ ماماندار ونى كوروناۆيرۋس بولۋى مۇمكىن دەگەن بولجام ايتقان. كورەيا ورتالىق تەلەگراف اگەنتتىگىنىڭ اقپاراتىنا سەنسەك، سەنبى كۇنى كورەيا ەڭبەك پارتياسى ورتالىق كوميتەتى ساياسي بيۋروسىنىڭ كەڭەيتىلگەن ماجىلىسىندە ق ح د ر كوشباسشىسى كيم چەن ىن اتالعان ايماقتا توتەنشە جاعداي رەجيمىن جاريالاعان. سونداي- اق مەملەكەتتىڭ ەپيدەمياعا قارسى كۇرەس جۇيەسى بارىنشا مىعىم دايىندىققا كوشتى. 24-شىلدە كۇنى كەسون قالاسىندا لوكداۋن رەجيمى ەنگىزىلىپ، ونىڭ اۋداندارى ءبىر- بىرىنەن وقشاۋلاندى. كوروناۆيرۋس جۇقتىردى دەگەن كۇدىكتى ناۋقاس قازىر كارانتيندە جاتىر. ونىمەن بايلانىستا بولعان بارلىق ادامدار جانە تاياۋدا كەسونعا بارعان تۇرعىندار انىقتالىپ، ەسەپكە الىنىپ جاتىر.
