كاتاتۋمبو - نايزاعايلى مەكەن

نۇر-سۇلتان. قازاقپارا ت- نايزاعاي - تابيعاتتىڭ كەرەمەت، تىلسىم قۇبىلىستارىنىڭ ءبىرى. اتا- بابالارىمىز نايزاعايدى قۇدىرەتتى كۇش دەپ ساناپ، اسپان الەمىنىڭ قاھارىنا بالاعان. مۇنىڭ شىندىعى دا بار.

قازىرگى عىلىم دامىعان ۋاقىتتا نايزاعايدىڭ قۋاتتى زارياد كۇشى بار قۇبىلىس ەكەنى بەلگىلى بولعاندا، ودان ادامزاتتىڭ قورقىنىشى كوبەيمەسە، سەيىلگەن ەمەس. سوندىقتان وعان قىزىقتاپ قاراۋعا، ۇرەيىمەن قاۋىشۋعا ءۇيىرمىز.

جەر بەتىندە نايزاعاي ءجيى تۇراتىن مەكەن بارىن بىلەسىز بە؟ ماسەلەن، ۆەنەسۋەلاداعى كاتاتۋمبو وزەنىنىڭ ماراكايبو كولىنە قۇيار تۇسىندا نايزاعاي ۇزىلگەن ەمەس. قارا اسپانى تۇنجىراپ، جىلىنا 200 كۇن نايزاعاي تۇرادى. كۇنىنە ون ساعات بويى جۇزدەگەن نايزاعاي وينايدى. نايزاعايدىڭ بيىكتىگى كولدەن 5 شاقىرىمدا.

كولدىڭ ۇستىندە سوققان قاتتى جەل بۇلتتىڭ ءبارىن كوكجيەككە تىرەپ، قۋاتتى ەلەكتر داۋىلىنىڭ پايدا بولۋىنا اكەلەدى. كولدىڭ ماڭايىن تاۋ قورشاپ جاتقاندىقتان، جان- جاقتان جينالعان بۇلت وسى جەرگە ءۇيىرىلىپ، ءبىر- بىرىمەن سوقتىعىسىپ، شەتكە شىعا الماي قالادى.

ونىڭ ۇستىنە، ماراكايبو كولى - بالشىقتى كول. بالشىقتان بولىنگەن مەتان بۋمەن، جىلى اۋامەن ارالاسىپ، قابات- قابات بۇلتقا، ەلەكتر قۋاتى مىقتى اۋا اعىنىنا اينالادى. 8 شاقىرىمعا دەيىن سوزىلعان زارياد تىزبەگىنىڭ پايدا بولاتىنى سودان.