تەننيس: قىتايدا بيىلعا جوسپارلانعان بارلىق تۋرنيرلەر وتپەيتىن بولدى
ايەلدەر تەننيس قاۋىمداستىعى (WTA) ءوزىنىڭ رەسمي سايتىندا ءمالىم ەتكەندەي، قىتاي ۇكىمەتى كوروناۆيرۋس ىندەتىنە بايلانىستى جىل اياعىنا دەيىن بارلىق حالىقارالىق جارىستاردى وتكىزبەۋ تۋرالى قاۋلى قابىلداعان. وسىعان بايلانىستى ۋحان، نانچان، بەيجىڭ، جىڭجۋ، گۋانجۋ جارىستارى وتپەيدى. سونىمەن قاتار شىنجىندەگى WTA قورىتىندى ءتۋرنيرى، چجۋحايداعى كىشى قورىتىندى تۋرنير بولمايدى. WTA، اسىرەسە، شىنجىندەگى جىلدىڭ قورىتىندى ءتۋرنيرىن وتكىزبەۋدەن 50 ميلليونداي ا ق ش دوللارىن جوعالتپاقشى. سول سەكىلدى كاسىپقوي تەننيسشىلەر قاۋىمداستىعى (ATP) دا ەرلەر اراسىندا شانحايدا ماستەرس، بەيجىڭدە ATP-500, چىڭدۋ مەن چجۋحايدا ATP-250 دودالارىنىڭ وتپەيتىنىن مالىمدەدى. ەسكە سالا كەتەيىك، بۇدان بۇرىن قازاقستاندىق ەلەنا رىباكينانىڭ پالەرمو تۋرنيرىنە قاتىساتىنىن جازعان بولاتىنبىز.
