ساتبايەۆ قالاسىنداعى وقيعاعا بايلانىستى جەڭىس قاسىمبەك ءوڭىر حالقىنا ۇندەۋ جولدادى
بۇل تۋرالى قاراعاندى وبلىسىنىڭ اكىمى جەڭىس قاسىمبەك ايماق تۇرعىندارىنا ارنالعان بەينەۇندەۋدە ءمالىم ەتتى، دەپ حابارلايدى قازاقپارات ءتىلشىسى.
وبلىس اكىمى كۇدىكتىنىڭ ۇستالعانىن، قازىر بارلىق قاجەتتى تەرگەۋ شارالارى جۇرگىزىلىپ جاتقانىن ايتتى. قىز اتا- اناسىمەن بىرگە ۇيىندە. ءوڭىر باسشىسى بالانىڭ دەنساۋلىعىن ۇزدىك ماماندار قاداعالايتىنىنا سەندىردى.
«وكىنىشكە قاراي، ساتبايەۆتا وقيعا ورىن العان ءتۇنى كىناسىز ادامدارعا زيان كەلگەن. ءتارتىپ بۇزعانداردى توقتاتۋ ءۇشىن جەكە قۇرام وقيعا ورنىنا جۇمىلدىرىلدى. مەن ازاماتتارىمىزدىڭ جۇرەگىندە نارازىلىق تولى ەكەنىن تۇسىنەمىن جانە كەلىسەمىن. ءبىراق ءبىز قۇقىقتىق مەملەكەتتە ءومىر سۇرەمىز، سوندىقتان دا ەموتسيامىزدى تىيىپ، بولعان جاعدايدى قۇقىقتىق الاڭدا قاراۋىمىز كەرەك»، - دەدى جەڭىس قاسىمبەك.
ول سونداي- اق تەرگەۋ اياقتالعاننان كەيىن كىنالىنى قاتاڭ جازا كۇتىپ تۇرعانىن اتاپ ءوتتى.
ەستەرىڭىزگە سالا كەتەيىك، بيىلعى 23 -شىلدەدە ساتبايەۆ پوليتسياسىنا ەر ادام بەس جاسار قىزىنىڭ جوعالعانىن ايتىپ، ارىزدانعان بولاتىن. قىزدى ىزدەۋ جۇمىستارىنا جەرگىلىكتى پوليتسيا ءبولىمىنىڭ بارلىق جەكە قۇرامى مەن جۇزدەن استام ەرىكتى قاتىستى. بالا تۇندە كوپقاباتتى ۇيلەردىڭ بىرىنەن تابىلدى. بۇل شاھاردا ۇلكەن شۋ تۋعىزدى. قازىر قالادا جاعداي تۇراقتاندى. ساتبايەۆ كۇندەلىكتى رەجيمدە ءومىر ءسۇرىپ جاتىر. بۇگىن ىشكى ىستەر ءمينيسترى ەرلان تۇرعىمبايەۆ ساتبايەۆتاعى بەس جاسار قىز بالانىڭ جوعالۋىنا قاتىستى وقيعانىڭ ءمان- جايىن ايتىپ بەرگەن بولاتىن. سونداي- اق، پرەزيدەنت شورناق اۋىلى مەن ساتبايەۆ قالاسىنداعى جاعدايعا بايلانىستى كەڭەس وتكىزدى.
