ونلاين قۇربان شالۋ: مۇقتاج جاندارعا ەت ۇلەستىرۋگە ۆولونتەرلەر قاجەت
«كارانتين كەزىندە ونلاين قۇرباندىق شالۋ جوباسىنا مەملەكەتىمىز قولداۋ كورسەتۋدە. ءار وبلىستا قۇربان شالاتىن ورىندار بەلگىلەنىپ، جەرگىلىكتى اكىمدىك پەن سانيتارلىق دارىگەرلەردىڭ رۇقساتىمەن، ءتارتىپ ساقشىلارىنىڭ قاداعالاۋىمەن كارانتين تالاپتارىن قاتاڭ تۇردە ساقتاي وتىرىپ ورىندالادى. وسى تۇستا ءار وبلىستىڭ ءدىني احۋالىنا جاۋاپ بەرەتىن مەكەمەلەردى ءبىزدىڭ وبلىستىق وكىلدىكتەرمەن بىرگە جۇمىس ىستەۋگە شاقىرامىن. وسى ماقساتتا ءدىني باسقارما مەن وبىلستىق مەشىتتەر جانىنان اقپارات بەرۋ ورتالىقتارى دا قۇرىلدى. ونلاين قۇرباندىق تۋرالى اقپارات العىسى كەلەتىن ازاماتتار وسى ورتالىقتارعا حابارلاسا الادى»، - دەدى سپيكەر ورتالىق كوممۋنيكاتسيالار قىزمەتىندە وتكەن ونلاين بريفينگتە.
سونىمەن بىرگە، باس ءمۇفتي وسىنداي قيىن- قىستاۋ كەزدە ازاماتتاردى پەندەشىلىككە سالىنىپ، پايدا تابۋ مەن الىپساتارلىققا بارماي، مال باعاسىن قىمباتتاتپاۋعا، حالىقتىڭ جاعدايىن ەسكەرۋگە شاقىردى.
«قاساپشىلار دا ءوز قىزمەتىنە الاتىن اقىسىن قىمباتتاتپاي، جاناشىرلىقپەن ەلگە قىزمەت ەتەدى دەپ ۇمىتتەنەمىز. قۇرباندىق شالۋدى جۇزەگە اسىرۋ ءۇشىن وبلىس، قالا اكىمدەرىن، سانيتارلىق- ەپيدەميولوگيالىق باسقارما قىزمەتكەرلەرىن ءتارتىپ ساقشىلارىمەن بىرلەسىپ اتسالىسۋعا ۇندەيمىن. شالىنعان قۇربان ەتتەرىن الەۋمەتتىك از قامتىلعان وتباسىلارعا، مۇقتاج جاندارعا ۇلەستىرۋ ءۇشىن ەرىكتىلەردى ساۋابى مول ىسكە قول ۇشىن بەرۋگە شاقىرامىز»، - دەدى ناۋرىزباي قاجى تاعان ۇلى. بۇعان دەيىن ق م د ب ءتوراعاسى ساتپايەۆ قالاسىنداعى وقيعاعا قاتىستى پىكىر ءبىلدىردى جانە قاشىقتان قۇربان شالۋ جۇيەسىنىڭ قالاي جۇمىسىستەيتىنىن ءتۇسىندىردى. 31-شىلدە كۇنى قازاقستان مەشىتتەرىندە قۇربان ايت نامازى وقىلمايدى.
