باس ءمۇفتي ساتپايەۆ قالاسىنداعى وقيعاعا قاتىسى پىكىر ءبىلدىردى

«كەشە عانا قابىرعامىزدى قايىستىراتىن، جانىمىزعا باتاتىن جاعدايلار جونىندە ەستىپ قالدىق. وسى تۇستا، قۇرمەتتى حالايىق، ءبىز بارىنشا سابىرلىق تانىتايىق. ءبىز - قۇقىقتىق مەملەكەتپىز. قىلمىسكەرلەر مىندەتتى تۇردە جازاسىن زاڭ اياسىندا الاتىن بولادى. تەك بۇل كەزدە ءتارتىپ ساقتاماي، بايقاماي كىشكەنتاي جاعدايدى ۇلكەنگە اينالدىرىپ المايىق، قۇرمەتتى اعايىن. وسى تۇستا قۇقىق قورعاۋ ورگاندارىنا وسى ماسەلەنى اشىق قاراپ، حالىققا شىنايى اقپارات بەرسە دەگەن ۇمىتتەمىز. اللا بارشامىزدىڭ تىلەگىمىزدى قابىل ەتسىن»، - دەدى باس ءمۇفتي ورتالىق كوممۋنيكاتسيالار قىزمەتىندە.

ەسكە سالا كەتسەك، بۇگىن ىشكى ىستەر ءمينيسترى ەرلان تۇرعىمبايەۆ ساتبايەۆتاعى بەس جاسار قىز بالانىڭ جوعالۋىنا قاتىستى وقيعانىڭ ءمان- جايىن ايتىپ بەرگەن بولاتىن.

«23-شىلدە كۇنى كەشكى ساعات 9 دا ساتبايەۆ قالاسىنىڭ ىشكى ىستەر باسقارماسىنا 5 جاسار قىزدىڭ جوعالعانى تۋرالى ارىز ءتۇستى. دەرەۋ ىزدەستىرۋ ناتيجەسىندە ءبۇلدىرشىن قالاداعى ءبىر ۇيدەن تابىلدى. جاس قىزدى زورلادى دەگەن كۇدىكپەن ءبىر ازامات قاماۋعا الىندى. ءبىراق بىرنەشە ادام كۇدىكتىنى ءوز قولىنا بەرۋدى تالاپ ەتتى، جانجال شىعاردى»، - دەدى ەرلان تۇرعىمبايەۆ و ك ق- دا وتكەن باسپا ءسوز ءماسليحاتىندا.

سونداي-اق، بۇگىن پرەزيدەنت شورناق اۋىلى مەن ساتبايەۆ قالاسىنداعى جاعدايعا بايلانىستى كەڭەس وتكىزدى.