نۇر-سۇلتان قالاسىنان شىعاتىن جولدارعا بەكەتتەر قويىلدى
كوروناۆيرۋسپەن كۇرەس جانە كارانتيندىك شارالاردىڭ كۇشەيۋى بارىسىندا تۋريستىك ايماقتار جابىلادى، دەپ حابارلايدى قازاقپارات ەلوردالىق پوليتسيا دەپارتامەنتىنە سىلتەمە جاساپ.
نۇر-سۇلتان قالاسىنان شىعاتىن جولدارعا بەكەتتەر قويىلعان، وندا ەلوردالىق پوليتسەيلەر ازاماتتارمەن دەمالىس ورىندارىنداعى اۆتوكولىكتىڭ قوزعالىسى شەكتەلگەنى تۋرالى ءتۇسىندىرۋ جۇمىستارىن جۇرگىزەدى جانە ماسكا تاعىپ، الەۋمەتتىك قاشىقتىقتى ساقتاۋ قاجەتتىگى تۋرالى ەسكەرتەدى.
«شەكتەۋ شارالارى ۇنەمى ايرىقشا باقىلاۋدا بولادى. كوروناۆيرۋسپەن كۇرەسۋ ءۇشىن ەلوردا تۇرعىندارى مەن قوناقتارى جاعدايعا تۇسىنىستىكپەن قاراپ، سۋعا شومىلۋ ماۋسىمى ءوتىپ جاتقان دەمالىس ورىندارىنا، ادام كوپ جينالاتىن ورىندارعا بارماۋى قاجەت»، - دەدى نۇر-سۇلتان قالاسىنىڭ پوليتسيا دەپارتامەنتى جەرگىلىكتى پوليتسيا قىزمەتىنىڭ باسشىسى عوسمان جاكين.
سوڭعى ەكى كۇندە نۇر-سۇلتاندا پوليتسيا قىزمەتكەرلەرى، ەپيدەميولوگتەر، ۆولونتەرلەر، جەرگىلىكتى اتقارۋشى ورگانداردىڭ وكىلدەرى بار ءموبيلدى توپتار كارانتيندى بۇزۋدىڭ 50 وقيعاسىن تىركەلدى، ونىڭ ىشىندە 29 كاسىپكەر ماسكا كيۋ جانە الەۋمەتتىك قاشىقتىقتى ساقتاۋ بويىنشا مىندەتتى تالاپتاردى بۇزعان جانە 21 كاسىپكەر - تىيىم سالىنعان ۋاقىتتا جۇمىس ىستەگەن. زاڭبۇزۋشىلىقتار تۋرالى ماتەريالدار جەرگىلىكتى دەنساۋلىق ساقتاۋ ورگانىنا - تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنە بەرىلدى. قازىرگى ۋاقىتتا ەلوردادا 16 مونيتورينگ ءموبيلدى توبى جۇمىس ىستەيدى. پوليتسيا قىزمەتكەرلەرى ويىن- ساۋىق ورىندارىنا، قوعامدىق تاماقتانۋ نىساندارىنا، ساۋنا، مونشالار، اتتراكتسيوندارعا كىرىپ، كارانتيندىك شارالار تۋرالى ەسكەرتەدى جانە ءتارتىپ بۇزۋشىلىق فاكتىلەرىن انىقتايدى.
«نۇر-سۇلتان قالاسىنىڭ پوليتسيا دەپارتامەنتى ازاماتتاردى قوعامدىق ورىنداردا جاۋاپتى بولۋعا جانە سانيتارلىق نورمالاردى ساقتاۋعا شاقىرادى. سونداي-اق كوروناۆيرۋستىڭ تارالۋىنا جول بەرمەۋ ماقساتىندا تۇرعىندارعا قالا سىرتىنا شىقپاۋعا شاقىرادى»، - دەيدى دەپارتامەنت.
