اتىراۋداعى ۆيرۋستىڭ قازىرگى تارالۋ جاعدايى قالاي؟

اتىراۋ. قازاقپارات - كوروناۆيرۋستىڭ جەڭىل تۇرىنە جانە ۆيرۋستىق ينفەكسيالارعا شالدىققان ناۋقاستاردان بولەك، وبلىس تۇرعىندارى دا دارىگەرلەر كەڭەسىن ونلاين رەجيمدە الا الادى، دەپ حابارلايدى اتىراۋ وبلىستىق كوممۋنيكاتسيالار قىزمەتى.

وبلىستىق جەدەل جاردەم قىزمەتى ستانساسى ديرەكتورىنىڭ مىندەتىن اتقارۋشى نارگيز بايمولدايەۆانىڭ ايتۋىنشا، قازىرگى ۋاقىتتا 103 ءنومىرى بويىنشا call-ورتالىققا حابارلاسۋشىلار سانى ەداۋىر تومەندەگەن.

«20-ماۋسىمنان باستاپ قوڭىراۋ شالۋشىلار كوپ بولدى، تاۋلىگىنە 1300 قوڭىراۋ كەلىپ تۇسەتىن. ال قازىر ولاردىڭ سانى - شامامەن 720-730. ونىڭ 300 گە جۋىعى - اۋدان تۇرعىندارىنان. وسىلايشا كەلىپ تۇسەتىن قوڭىراۋلار 25 پايىزعا ازايىپ، ونلاين-كونسۋلتاتسيا سانى دا كەمىدى. حابارلاسۋشىلاردىڭ كوبى - دەنە قىزۋى كوتەرىلىپ، كوروناۆيرۋس ينفەكسياسىنىڭ بەلگىلەرى بار- جوعىن انىقتاعىسى كەلەتىندەر، سونداي-اق، مۇنداي جاعدايدا نە ىستەۋ كەرەك، قايدا بارىپ، قانداي ەم قابىلداۋ قاجەتتىگىن سۇرايتىن ازاماتتار»، - دەيدى وبلىستىق جەدەل جاردەم قىزمەتى ستانساسى ديرەكتورىنىڭ مىندەتىن اتقارۋشى نارگيز بايمولدايەۆا.

ايتا كەتەيىك، call-ورتالىقتاعى ماماندار تۇرعىندارعا قانداي سيمپتوماتيكالىق ەم قابىلداۋ كەرەكتىگىن، قانشا ۋاقىت، قانداي ءدارى- دارمەكتى ءىشۋ جايىندا ءتۇسىندىرۋ جۇمىستارىمەن اينالىسادى جانە كەڭەس بەرەدى. بۇگىندە اتالمىش ورتالىقتا 36 تاجىربيەلى مامان قىزمەت ەتەدى. ولار 4 اۋىسىمدا، تاۋلىگىنە 24 ساعات جۇمىس ىستەيدى.